काठमाडौं । चीनको हाङझाउमा सेप्टेम्बर २३ देखि सुरु भएको एसियाली खेलकुदको १९औँ संस्करण आइतबार समाप्त हुँदै छ । हाङझाउमा १६ दिनसम्म चलेको खेलकुदको यो महाकुम्भको समापन समारोह आज राति हुनेछ ।

चीनका राष्ट्रपति सी चिनफिङबाट उद्घाटन भएको एसियाडको समापनमा प्रधानमन्त्री लि छ्याङ उपस्थित हुनेछन् । एसियाडमा एसियाका ४५ देशहरुले सहभागिता जनाएका थिए । यस संस्करणमा ४० खेलका कुल ४८२ इभेन्टमा प्रतिस्पर्धा भएको थियो ।

यस संस्करणमा घरेलु टिम चीन पदक सूचीको शीर्ष स्थानमा रह्यो । चीनले २०१ स्वर्ण, १११ रजत र ७१ काँस्यसहित कुल ३८३ पदक घरमै राख्यो । यस्तै, दोस्रो स्थानको जापानले ५२ स्वर्ण, ६७ रजत र ६९ काँस्य जित्यो ।

तेस्रो स्थानको दक्षिण कोरियाले ४२ स्वर्ण, ५९ रजत र ८९ काँस्यपदक जितेको छ । यस्तै, चौथो स्थानको भारतले २८ स्वर्ण, ३८ रजत र ४१ काँस्यसहित १०७ पदक जित्यो ।

एसियाली खेलकुदको १९औँ संस्करणमा यी चार देशले मात्र १०० भन्दा धेरै पदक जिते । यस संस्करणमा सहभागी ४५ देशमध्ये ३८ देशले कम्तीमा एक काँस्यपदक जिते ।

सहभागी देशमध्ये ३२औँ स्थानमा आसिन नेपालले भने दुई पदकमात्र जित्यो । नेपालका लागि करातेकी एरिका गुरुङले रजत र महिला कबड्डी टिमले काँस्य जित्यो । २९ खेलमा २५३ खेलाडीले प्रतिस्पर्धा गरे पनि नेपालका लागि अन्यले पदक ल्याउन सकेनन् । महिला कबड्डी टिमले एसियाडको ‘डेब्यू’ मै काँस्य जितेको हो । नेपालले करातेमा पनि पहिलोपटक रजत पदक जितेको हो ।

एसियाली खेलकुदमा नेपालले समग्रमा तेस्रोपटक रजत जितेको हो । यसअघि, नेपालले सन् १९९८ मा थाइल्यान्डमा र २०१८ मा इन्डोनेसियामा भएको एसियाली खेलकुदमा रजत जितेको थियो । १९९८ मा तेक्वान्दोकी सविता राजभण्डारी र २०१८ मा प्याराग्लाइडिङको टिमले नेपाललाई रजत दिलाएको थियो । एसियाडमा नेपालले हालसम्म स्वर्ण भने जित्न सकेको छैन ।

एसियाली खेलकुदमा नेपालले १७ वर्षपछि दोहोरो पदक जितेको हो । नेपालले पछिल्लोपटक सन् २००६ मा दोहामा भएको एसियाली खेलकुदमा तीन काँस्य जितेको थियो । त्यसयता नेपालले समान एक पदकमात्र जितेको थियो ।

एसियाली खेलकुदको इतिहासमा नेपालले हालसम्म तीन रजत र २३ कांस्यसहित कुल २६ पदक जितेको छ ।