काठमाडौं । चीनको हाङझाउमा जारी १९औँ एसियाली खेलकुदअन्तर्गत कराँतेमा नेपालकी एरिका गुरुङले रजतपदक जितेकी छन् ।

एरिकाले महिला ६८ केजी तौल समूहमा हङकङकी यान काइ होलाइलाई ८–४ ले पराजित गर्दै फाइलनमा स्थान बनाएसँगै रजत पक्का गरेकी थिइन् । स्वर्णपदकका निम्ति उनले कजाखस्तानकी सोफ्या बेर्लुस्सेभाको चुनौती भने पन्छाउन सकिनन् । उनी बेर्लुस्सेभासँग ३–० ले पराजित भइन् ।

जारी एसियाडमा नेपाली खेलाडीले जितेको यो दोस्रो पदक हो । यसअघि, महिला कबड्डी टोलीले ‘डेब्यु’मै ऐतिहासिक कास्यपदक जितेको थियो ।

एसियाली खेलकुदको इतिहासमा नेपालले तेस्रोपटक रजतपदक जितेको हो । एसियाली खेलकुदमा नेपालले कराँतेमा भने पहिलो रजत जितेको छ । यसअघि, तेक्वान्दोबाट सविता राजभण्डारी र पाराग्लाइडिङ टिमले रजतपदक जितेको थियो ।