काठमाडौं । सत्तासाझेदार दल नेपाली कांग्रेसका सांसद सुनील शर्माले प्रधानमन्त्रीले ठूला व्यापारीबाट करोडौँ असुली गर्न सम्पत्ति शुद्धीकरण अनुसन्धान विभाग आफ्नो कार्यालय मातहत राखेको आरोप लगाएका छन् ।

शनिबार सिंहदरबारमा सम्पत्ति शुद्धीकरणसम्बन्धी विधेयकमाथिको छलफलका क्रममा उनले चुनावी प्रयोजनका निम्ति करोडौँ रुपैयाँ असुली गर्न सो विभाग प्रधानमन्त्रीले आफ्नो मातहतको कार्यालयमा राखेको जिकिर गरेका हुन् ।

सांसद शर्माले देशमा कानुनमाथि टेकेरै अपराध गर्ने काम भइरहेको भन्दै आक्रोश व्यक्त गरे । उनले क्यासिनो सञ्चालनका निम्ति तोकिएको रकमको सीमाको दायरा बढाउने गरी कानुनी व्यवस्था गर्न सरकारको ध्यानाकर्षण गराए ।

“यो सम्पत्ति शद्धीकरण भन्नेचाहिँ प्रधानमन्त्री कार्यालयमा लगेर राखिएको छ के ! यो किन राख्या भने’नि माल खानका लागि राखेको हो ! चुनावका बेला प्राइममिनिस्टर जोसुकै भए पनि प्राइममिनिस्टरहरूले ठूला व्यापारीहरूलाई ट्वाक्क चिठी काट्ने । छापा हान्न पठाउने,” उनले भने, “अनि, माल यति करोड भनेर लिने, अनि चुनाव लड्ने । यो देश यस्तो अपराधीकरण भएको छ कानुनमा टेकेर ।”

अर्की सांसद नागिना यादवले देशको हित हुने गरी सम्पत्ति शुद्धीकरणसम्बन्धी कानुन निर्माण गर्नुपर्ने बताइन् । उनले नेपाल पर्यटन र रेमिट्यान्समा आधारित मुलुक भएको उल्लेख गरिन्े । पर्यटकका निम्ति उपयोगी हुने खालका कानुन निर्माणमा सरकारले ध्यान दिनुपर्नेमा उनले जोड दिइन् ।

“फलानो कन्ट्रीले हामीलाई के गर्छ ? फलानो कन्ट्रीको हितमा भएन भनेर हामीले सोच्ने होइन । हामीले आफ्नो देश बनाउने हो । अर्काको देशलाई हेर्ने होइन । आफ्नो देश बनाउनेतिर जानुपर्छ भन्ने मेरो मान्यता हो,” उनले भनिन्, “त्यसकारण मैले राष्ट्र बैंकको मनिटरिङ पोलिसीमा पाँच हजार डलरको जुन प्रावधान छ, त्यसको दायरा बढाउनुपर्छ क्यासिनो खेल्नका लागि । हाम्रो कन्ट्री पर्यटन र रेमिटयान्समै आधारित देश भएको भएर यसको इकोनोमीलाई अगाडि बढाउनका लागि यो व्यवस्था गर्नुपर्छ भन्ने मलाई लाग्छ ।”

सांसद यादवले सम्पत्ति शुद्धीकरणसम्बन्धी विधेयकलाई यथास्थितिमा पारित गराउने पक्षमा आफूहरू नरहेको पटकपटक दोहोर्‍याइन् ।