काठमाडौं । कजारिया सेरामिक्स लिमिटेड र रमेश कर्पबीच नेपालको सबैभन्दा ठूलो टाइल उत्पादन ५०ः५० को संयुक्त लगानी कजारिया रमेश टाइल्स लिमिटेडको वित्तीय कन्सोर्टियम सम्झौता भएको छ । करिब चार अर्बको परियोजनाका लागि तीन अर्बको पर्याप्त लगानी कोष सफलतापूर्वक प्राप्त गरेको बताइएको छ ।

यो सम्झौता एभरेष्ट बैंक लिमिटेडको नेतृत्वमा नबिल बैंक लिमिटेड, नेपाल एसबिआई बैंक लिमिटेड र प्रभु बैंक लिमिटेडलगायत अन्य तीन प्रमुख वित्तीय संस्थाहरूसँगको सहकार्यमा भएको हो ।

यो सम्झौतामा रमेश कर्पका उपाध्यक्ष रोहित गुप्ता र एभरेष्ट बैंक लिमिटेडका प्रमुख कार्यकारी अधिकृत सुदेश खालिङले हस्ताक्षर गरेका छन् ।

नेपाललाई भिट्रिफाइड टाइल्स र सेरामिक उत्पादनमा आत्मनिर्भर बनाउने दूरदर्शी प्रतिबद्धताका साथ कजारिया रमेश टाइल्स लिमिटेडले नेपालमा टाइल उत्पादनको लागि ग्रिनफिल्ड परियोजना सुरु गरेका छन् । यो उद्यम कजारिया सेरामिक्स, भारतको अग्रणी र विश्वको सातौँ सबैभन्दा ठूलो टाइल उत्पादकसँग ५०ः५० को संयुक्त लगानी उद्यमको रूपमा सञ्चालन गरिएको छ ।

यो परियोजना नेपालभित्र उच्च गुणस्तरको कजारिया टाइल्स उत्पादन गर्न समर्पित रहने बताइएको छ । नवलपरासी क्षेत्रमा अवस्थित अत्याधुनिक उत्पादन उद्योग ८० लाख वर्गमिटरको उत्पादन क्षमता भएकोे नेपालको सबैभन्दा ठूलो टाइल उत्पादन गर्ने उद्योग हुने पनि कम्पनीको भनाइ छ ।

कम्पनीको लक्ष्य उच्च गुणस्तरको प्राविधिक विशेषता मिश्रित उत्कृष्ट डिजाइनका कजारिया फ्लोर टाइलहरू नेपाली जनतामाझ सहज रूपमा उपलब्ध गराएर नेपाली जनताको जीवनलाई समृद्ध बनाउनु रहेको पनि बताइएको छ ।

कजारियाका गुणस्तरीय उत्पदानहरू सबैका लागि थप किफायती बनाउने लक्ष्य राखेका छन् । यो २०२४ मार्चसम्ममा पूर्ण रूपमा कारखाना सञ्चालनमा आउने बताइएको छ ।