काठमाडौं । संयुक्त अरब इमिरेट्स (यूएई)का लागि नेपाली राजदूत तेजबहादुर क्षेत्रीले आफ्नो ओहदाको प्रमाणपत्र पेस गरेका छन् ।

यूएईका राष्ट्रपति शेख मोहम्मद बिन जायद अल नाह्यानसमक्ष पेस गरेका छन् ।

बुधबार राष्ट्रपति कार्यालय कसर अल वाटनमा आयोजित विशेष समारोहमा राष्ट्रपति नाह्यानसमक्ष ओहदाको प्रमाणपत्र प्रस्तुत गरेका हुन् ।

क्षत्रीलाई भदौ ११ मा राष्ट्रपति रामचन्द्र पौडेलले मन्त्रिपरिषद्को सिफारिसमा यूएईका लागि गैरआवासीय राजदूत नियुक्त गरेका थिए । नियुक्तिको एक महिनापछि असोज ११ मा कार्यभार सम्हाल्न अबुधाबी पुगेका हुन् ।

ओहदाको प्रस्तुतिपछि राजदूत क्षेत्रीले राष्ट्रपति नाह्यानलाई समकक्षी नेपालका राष्ट्रपति पौडेलको शुभकामना सन्देश सुनाएका थिए । शुभकामना सन्देशमा पौडेलले राष्ट्रपति नाह्यानको सुस्वास्थ्य, सुख, शान्ति र समृद्धिको कामना गर्दै यूएईको निरन्तर शान्ति, उन्नति र समृद्धिको कामना गरेका छन् ।

राजदूत क्षेत्रीले सन् १९७७ मा कूटनीतिक सम्बन्ध स्थापना भएदेखि नै दुई मित्र राष्ट्रबीच कायम रहेको द्विपक्षीय सम्बन्धको उत्कृष्ट अवस्थाबारे प्रकाश पार्दै नेपाली नागरिकका लागि यूएई सबैभन्दा आकर्षक गन्तव्य भएको बताए ।

नेपालीलाई विश्वास गरेर रोजगारीमा सम्मानजनक व्यवहार गरिएकोमा उनले यूएई सरकारलाई धन्यवाद दिए । नेपाल र यूएईबीच धेरै क्षेत्रमा मिलेर काम गर्ने सम्भावना रहेको उल्लेख गर्दै राजदूत क्षेत्रीले इमिरेटी जनता र सम्पूर्ण मानवताको हितका लागि राष्ट्रपतिको दूरदर्शी नेतृत्वको प्रशंसा पनि गरे ।

राष्ट्रपति नाह्यानले यूएईका लागि नेपालको राजदूतका रूपमा क्षेत्रीलाई स्वागत गर्दै सफल कार्यकालको शुभकामना व्यक्त गरे ।

नेपाली समकक्षी पौडेलको सुस्वास्थ्य, सुख, शान्ति र समृद्धिको कामना गर्दै नेपालका मित्रजनको उत्तरोत्तर प्रगतिको कामना गरे । यूएईका राष्ट्रपति नाह्यानले द्विपक्षीय सम्बन्धको उत्कृष्ट अवस्थाप्रति सन्तुष्टि व्यक्त गर्दै आगामी दिनमा थप मजबुत हुनुपर्नेमा जोड दिए ।