काठमाडौं । नेकपा (माओवादी केन्द्र) का सांसद माधव सापकोटाले संसद्लाई प्रतिक्रियाको राजनीति गर्ने थलो नबनाउन आग्रह गरेका छन् ।

बिहीबार प्रतिनिधिसभाको बैठकमा बोल्दै उनले संसद् बैठकमा राजनीतिक कुराहरू र एकले अर्कोलाई आरोप–पत्यारोप गर्ने कुराहरू मात्रै हुन थालेको भन्दै त्यसो गर्नु नहुने बताए ।

उनले संसद्ले कानुन बनाउने कुराभन्दा राजनीतिक कुराहरूमा नै समय खर्च गरेको भन्दै अब संसद् र सांसदहरू जिम्मेवार हुनुपर्ने बताए । संसद्लाई प्रतिक्रियाको राजनीति गर्ने थलो नबनाउन सांसदहरूलाई आग्रह गरे ।

संसद्भित्र जनताका कुराहरू, संविधान र कानुन निर्माणका कुराहरूलाई जोड दिइनुपर्ने बताए । राजनीतिक कुराहरू सर्वदलीय बैठक गरेर भन्ने गर्नुपर्ने बताए । सांसद सापकोटाले संसद्लाई राजनीतिक कुण्ठा व्यक्त गर्ने थलो बनाउनु नहुने बताए ।