काठमाडौं । भौतिक पूर्वाधार तथा यातायातमन्त्री प्रकाश ज्वालाले सार्वजनिक खरिद ऐन विकास निर्माणका लागि सहज नभएको बताएका छन् । उनले सरकारको प्रतिनिधि भएर पनि आफूले खरिद ऐनबारे आलोचना गर्नुपरेको बताए ।

बुधबार प्रतिनिधिसभा अन्तरगतको पूर्वाधार विकास समितिको बैठकमा मन्त्री ज्वालाले आफू अर्थ समितिमा रहेका बेला खरिद ऐन संशोधनका लागि दिएको सुझाव पनि कार्यान्वयनमा आउन नसकेको बताए । 

सार्वजनिक खरिद ऐन विकास निर्माणका लागि सहज नभएकाले नै आफूले उक्त ऐनको नयाँ ड्राफ्ट बनाउनका लागि प्रधानमन्त्री पुष्पकमल दाहालसहितका सम्बन्धित निकायसँग छलफल गरी त्यसलाई अघि बढाउने काम गरेको उनको भनाइ छ । 

"अब यो कानुनी समस्या पनि छ । म आफैँ सरकारको एउटा प्रतिनिधि हो । म आफैँले पनि बोल्नुपरेको छ, ठाउँठाउँमा । सार्वजनिक खरिद ऐन चाहिँ वास्तवमा जो अहिले हामी त्यसबाट रुल गरिरहेका छौँ । त्यो विकास निर्माणको निम्ति सहज छैन," उनले भने ।