काठमाडौं । हाङझाव एसियाडको महिला कबड्डीमा नेपाली महिला टिम समूह चरणको दोस्रो खेलमा पराजित भएको छ । मंगलबार चियोसन गुवाली स्पोर्ट्स सेन्टरमा भएको समूह ‘बी’को आफ्नो दोस्रो खेलमा नेपाल साविक विजेता इरानसँग ४३–१९ ले पराजित भएको हो ।

नेपाल पहिलो हाफमा १९–११ ले पछि परेको थियो । इरानले दोस्रो हाफमा पनि अग्रता लिने क्रममा २४–८ स्कोर गरेको थियो । समूह ‘बी’मा नेपाल र इरानसहित बंगलादेश गरी तीन राष्ट्र छन् ।

नेपालले समूह चरणको पहिलो खेलमा भने बंगलादेशलाई ३७–२४ ले हराएको थियो ।

बुधबार हुने समूह ‘बी’को अन्तिम लिगमा इरानले बंगलादेशविरुद्ध प्रतिस्पर्धा गर्ने छ । त्यो खेलमा इरान विजयी भए नेपालले एसियाडको महिला कबड्डीतर्फ पहिलो सहभागितामै सेमिफाइनलमा स्थान बनाउदै कम्तीमा कांस्य पदक पक्का गर्ने छ ।

ब्याडमिन्टनमा रसिला प्रि–क्वार्टरफाइनलमा

ब्याडमिन्टनको महिला सिङ्गल्समा नेपालकी रशिला महर्जन मंगलबार प्रि–क्वार्टरफाइनलमा प्रवेश गरेकी छन् ।

बिन्जियाङ जिम्न्याजियममा भएको प्रतिस्पर्धामा रशिलाले मंगोलियाकी म्यागमार्टसिन गान्बटारलाई २१–४, २१–७ को सोझो सेटमा पराजित गरिन् । खेल १५ मिनेट चलेको थियो ।

यो स्पर्धासहित मंगलबार नेपालले चार स्पर्धामा प्रतिस्पर्धा गरेको थियो । बाँकी तीन स्पर्धामा भने नेपाल पराजित भयो ।

महिला सिङ्गल्समै थाइल्यान्डकी पोर्नपावीले नेपालकी अनुमाया राईलाई सिधा सेटमा २१–१० र २१–४ ले हराइन् ।

महिला डबल्समा चाइनिज ताइपेईंका चिङ या सु र चिन वान लिनको जोडीले नेपालका निता लम्साल र नङशल तामाङको जोडीलाई २१–१ र २१–५ तथा इन्डोनेसियाका द्विपुजी कुसुमा फेब्रियन र काहाया प्रतिवी अमालियाको जोडीले नेपालका रशिला महर्जन र अनुमाया राईको जोडीलाई २१–३ र २१–७ को सोझो सेटमा पाखा लगाए ।