विराटनगर । विराटनगरका रवि गुप्ता केही समय अघिसम्म कपडा पसल सञ्चालन गर्थे । थोक व्यापारीबाट कपडा किनेर बिक्री गर्थे ।

कोभिडकाल र त्यसपछि व्यापार गर्न कठिन भयो । खुद्रा व्यापारले घर चल्ने, तर उद्यमी नबनिने । उद्यम चलाउने हुटहुटी थियो । तर, उनी पर्खाइमा थिए, उचित अवसर र लगानीको । 

रविले सामाजिक सञ्जालमा आएको एउटा सूचना पढे । त्यसमा ‘नव उद्यमशील प्रवर्द्धनका लागि अवसर’ भन्ने उल्लेख थियो । उद्योग संगठन मोरङको त्यही सूचनालाई पछ्याएका गुप्ता डेढ वर्षमै उद्यमी बन्न सफल भए ।

“स्टार्टअपका लागि आएको त्यही सूचनाले म उद्यमी बन्ने अवसरको बाटो खोलिदियो,” गुप्ताले सुनाए ।

उद्योग संगठन मोरङको आयोजनामा स्टार्टअप एन्ड इनोभेसन कार्यक्रमको तेस्रो सहयोग कार्यक्रममा सहभागी हुन आएका गुप्ताले आफ्ता संघर्षका दिनबारे सुनाए ।

“थोक पसलबाट खुद्रा कपडा किनेर बेच्ने म अहिले आफैँ कपडा बिक्री गर्न बजारमा पठाउने भएको छु ।”

गुप्ताले विराटनगर–६ स्थित भाटभटेनी सुपरमार्केट पछाडि गार्मेन्ट उद्योग सञ्चालन गरेका छन् । यसअघि उनी संगठनको स्टार्टअप एन्ड इनोभेसनमा प्रशिक्षण लिए । नवीन व्यवसायिक सोच, विचार तथा अवधारणा र लगानीबारे जानकारी प्राप्त गरे ।

“मलाई यो कार्यक्रम निकै सहयोगी भयो, लगानी गरिदिने बैंकसमेतको प्रबन्ध भएकाले म जस्ता धेरैलाई सहज भएको छ,” उनले भने ।

यो वर्षमात्र गुप्ताले १२ लाख रुपैयाँभन्दा धेरै कर सरकारलाई बुझाएका छन् । पहिले पसल हुँदा प्यानमार्फत वार्षिक २५ हजार रुपैयाँसम्म मात्र कर तिर्थे । अहिले कारोबार बढेको छ । गुप्ताले विराटनगरमा सञ्चालन गरेको आरोहण इन्टरप्राइजेजमा २२ जनाले रोजगारी पाएका छन् ।

गुप्ता भन्छन्, “हामी जस्ता युवालाई समेट्न ल्याएको कार्यक्रमले सकारात्मक सहयोग पुगेको छ ।”

गुप्ताले टिसर्ट, ट्राउजर, ट्रयाक, बेवीसुट जस्ता लुगा उत्पादन गर्दै आएका छन् ।

संगठनको पहिलो र दोस्रो चरणको कार्यक्रममा सहभागी भएका आठजनाले केही न केही उद्यम सञ्चालन गरिसकेका छन् । कार्यक्रममा सहभागी हुने युवालाई संगठनले निःशुल्क रूपमा व्यावसायिक योजना तर्जुमा, योजनाअनुरूप आवश्यक पर्ने प्राविधिक विषयहरूमा मेन्टरसिप, कोचिङ तथा परामर्श दिने गरेको छ । एक वर्षसम्म चल्ने प्रशिक्षणमा उपभोक्तासँग साक्षात्कार गराउनेदेखि हाटबजार एवं विभिन्न विषयगत कार्यक्रमहरू समेत समेटिने गरिएको संगठनका अध्यक्ष राकेश सुरानाले बताए । 

उद्यमशीलता बढाउने संगठनले सुरु गरेको कार्यक्रममा विराटनगर महानगरपालिका, पूर्वाञ्चल विश्व विद्यालय, अन्तर प्रेरणा प्रा.लि., नेपाल युवा उद्यमी मञ्च, नेपाल चार्टर एकाउन्टेन्ट्स संघ, प्रदेश सरकारलगायतले सहयोग गर्दै आएका छन ।

नबिल, सिद्धार्थ, प्रभु र मेघा बैंकले लगानी सुनिश्चित गरिदिने गरेको संगठनका वरिष्ठ उपाध्यक्ष नन्दकिशोर राठीले जानकारी दिए ।