काठमाडौं । इन्डोनेसियाले आफ्नो पहिलो हाई–स्पिड रेलवेको उद्घाटन गरेको छ । चीनको बेल्ट एन्ड रोड इनिसिएटिभ (बीआरआई) परियोजनाअन्तर्गतको सहयोगमा निर्मित यो रेलवे ७.३ अर्ब अमेरिकी डलरको योजना हो ।

इन्डोनेसियाको राजधानी जकार्तालाई त्यहाँको प्रमुख आर्थिक हब बान्डुङसँग जोड्ने रेल सेवाको उद्घाटन राष्ट्रपति जोको विडोडोले गरेका हुन् । यो रेलवेको नाम हूश अर्थात् इन्डोनेसियाली भाषामा समय बचत र भरपर्दो भन्ने राखिएको छ ।

राष्ट्रपति विडोडोले देशको गम्भीर ट्राफिक जाम कम गर्न हूश जस्ता परियोजनालाई प्राथमिकता दिएका छन् । सन् २०१९ मै सञ्चालनमा ल्याउने लक्ष्य रहेको यो रेलवे कोभिड–१९ महामारीका कारण ढिला भएको थियो ।

यो परियोजना चिनियाँ राष्ट्रपति सी चिनफिङको १० वर्ष पुरानो बीआरआईको एक हिस्सा मानिएको छ । इन्डोनेसियाले चीनबाट सक्रिय रुपमा लगानी भित्र्याउने प्राथमिकता राखेको छ ।