मनसुन बाहिरिने औसत मिति आज, कति दिन ढिलो हुन्छ यो वर्ष ?

देश

सोमबार, असोज १५, २०८०

मनसुन बाहिरिने औसत मिति आज, कति दिन ढिलो हुन्छ यो वर्ष ? — फाइल तस्बिर

काठमाडौं । औसत मितिअनुसार नेपालबाट मनसुन बाहिरिने दिन आज (अक्टोबर २) हो । तर, यो वर्ष नेपालबाट मनसुन बाहिरिन केही दिन ढिलो हुने भएको छ ।

अक्टोबर २ औसत मिति भएकाले योभन्दा केही ढिलो अथवा छिटो पनि मनसुन बाहिरिने सम्भावना हुन्छ । यो वर्ष औसतभन्दा ढिलो मनसुन बाहिरिने भएको हो ।

“यो वर्ष मनसुन बाहिरिन केही ढिलो हुने भएको छ । न्यूनतम तीन/चार दिन ढिलो हुने भएको छ,” मौसमविद् बरुण पौडेलले बाह्रखरीसँग भने, “नेपालबाट मौसम बाहिरिनेक्रम अझै सुरु भएको छैन ।” नयाँ प्रणाली विकास भएर केहीदिन यता देशका केही भागमा वर्षा भइरहेको उनको भनाइ छ । नेपालमा हाल भारतको बिहार र पश्चिम बंगाल आसपासको क्षेत्रमा रहेको न्यूनचापीय क्षेत्रको समेत प्रभाव रहेको छ ।

नेपालमा पश्चिमबाट क्रमशः पूर्व सर्दै मनसुन पूर्वबाट बाहिरिन्छ । तर, यो वर्ष आजसम्म मनसुन पश्चिमबाट पूर्वतर्फ सर्नेक्रम सुरु भएको छैन ।