काठमाडौं । नेपालमा पछिल्ला वर्षमा विद्युतीय सवारीसाधन (ईभी)को बजार आक्रामक तरिकाले विस्तार हुँदै गएको छ । नयाँ बिक्री हुने गाडीहरुमा डिजेल–पेट्रोलभन्दा ईभीको संख्या उच्च रहेको अटो व्यवसायी बताउँछन् ।

अहिले बिक्री भइरहेका ईभी ब्रान्डमध्येको एमजी मोटर्सले बढ्दो बजार र ग्राहकहरुको आवश्यकताअनुसार पूर्वाधारको विकासलाई प्राथमिकता दिइरहेको बताएको छ ।

एमजीले हाल कमेट ईभी, एमजी ४ ईभी र एमजी जेडएस ईभी गरी तीन मोडेलअन्तर्गत पाँच भेरियन्टमा गाडी बिक्री गरिरहेको छ ।

ईभीको बजार र ग्राहकहरु बढेसँगै कम्पनीले आवश्यक सेवा केन्द्र, चार्जिङ स्टेसन र अन्य पूर्वाधार विकासलाई प्राथमिकता दिन थालेको बताएको हो ।

चार्जिङ स्टेसनको संख्या ५० पुर्‍याउँदै

एमजी मोटर्स नेपालको आधिकारिक वितरक प्यारामाउन्ट मोटर्स हो । प्यारामाउन्ट मोटर्सले हाल देशभर १९ वटा एमजी चार्जिङ स्टेसन उपलब्ध रहेको बताएको छ ।

कम्पनीले यसै वर्ष सन् २०२३ को अन्त्यसम्म देशभर चार्जिङ स्टेसनको संख्या ५० पुर्‍याउने लक्ष्य राखेको बताएको छ । मुलकोट, चितवन, कुरिनटार, बुटवल र ढल्केबरमा रहेका डीसी चार्जिङ स्टेसनबाट ३० मिनेटमै ८० प्रतिशतसम्म चार्ज गर्न सकिने कम्पनीको भनाइ छ ।

यस्तै, काठमाडौं, विर्तामोड, विराटनगर, चितवन, बर्दिबास, सिन्धुली, पोखरा, कुरिनटार, मुलकोट, बुटवल, वीरगञ्ज, इटहरी, जनकपुर र ढल्केबरमा एसी चार्जिङ स्टेसन रहेको छ ।

११ ठाउँमा सर्भिस सेन्टर

एमजीले देशभर हाल ११ वटा डिलरसिप र सोही संख्यामा सर्भिस सेन्टर रहेको बताएको छ । दाङ, बनेपा, भैरहवा, विराटनगर, पोखरा, चितवन, वीरगञ्ज, विर्तामोड, जनकपुर, बुटवल र धनगढीमा एमजीको डिलरसिप र सर्भिस सेन्टर रहेको छ ।

एमजीले देशभर सोरुम अथवा आउटलेटको संख्या १३ पुगेको बताएको छ । कम्पनीले हाल १८ लाख रुपैयाँदेखिका ईभी बिक्री गरिरहेको छ ।

दुई भेरियन्टमा रहेको एमजीको कमेट ईभीको पेस भेरियन्टको मूल्य १७ लाख ९९ हजार रुपैयाँ रहेको छ । प्लेको मूल्य २० लाख ९९ हजार रुपैयाँ रहेको छ ।

यस्तै, एमजी ४ ईभी कम्फर्टको मूल्य ४१ लाख ४९ हजार रुपैयाँ रहेको छ । लक्जरीको मूल्य ५८ लाख ९९ हजार रुपैयाँ रहेको छ । एमजी जेडएस डिलक्सको मूल्य ५२ लाख ९९ हजार रुपैयाँ रहेको छ ।

कम्पनीले बिक्रीपश्चात्को सेवा र सपोर्टमा विशेष ध्यान दिइरहेको बताएको छ ।