श्रवणकुमार ढुंगाना

माफिया, दलालहरूको नाइके बन्न सक्छ जो, सरकार पनि उसैलाई,   
निमुखा, निरीह, दरिद्रमाथि अत्याचार गर्न सक्छ जो, तरवार पनि उसैलाई ।

सुक्को खर्च गरेन बजेट, खायो, पुर्‍याउने ठाउँमा पुर्‍यायो उसले
त्यसैले त रोजे रोजेको ठाउँ अनि हाकिमको असीम प्यार पनि उसैलाई ।

माथिको नजरमा कुकुर थियो, डाँका थियो ऊ, एक्लै एक्लै खाँदासम्म,
माथि भाग पुगेपछि मान्छे–कुकुर छुट्ट्याउने अधिकार पनि उसैलाई ।

लायकको पदवी खोसी नालायकको छातीमा छ, निरीह भै हेर्छ जनता,
कठै, जनता ! त्यो नालायक पाल्ने भार, अहो, अत्याचार पनि उसैलाई !