काठमाडौं । नेपाल सरकार, एसियाली विकास बैंक (एडीबी) र विश्व बैंकले ‘त्रिपक्षीय पोर्टफोलियो समीक्षा बैठक’सम्पन्न गरेको छ । 

बैठकमा नेपालमा दुवै बैंकको सहयोगमा सञ्चालनमा रहेका परियोजनाको प्रगति मूल्यांकनमा छलफल भएको छ ।

अर्थमन्त्री डा. प्रकाशशरण महत र अर्थ सचिव कृष्णहरि पुष्करको अध्यक्षतामा बसेको बैठकमा नेपाल सरकारका सचिवहरू, एडीबी र विश्व बैंकका वरिष्ठ अधिकारी, आयोजना निर्देशक तथा कर्मचारीको सहभागिता रहेको थियो ।

सहभागीले हालको प्रगति विवरण साझा गरेका थिए । त्यससँगै बैठकमा समाधान नगरेमा समग्र पोर्टफोलियोमै बाधा पार्ने किसिमका विभिन्न अवरोध र चुनौतीको बारेमा छलफल समेत भएको छ ।

अर्थमन्त्री महतले विश्व बैंकले नेपालको विकासमा वर्षौंदेखि गर्दै आएको सहयोगको लागि कृतज्ञता व्यक्त गरेका छन् ।

बैठकमा एडीबी नेपालका अधिकृत अरनाउड हेकम्यानले पोर्टफोलियो सफलता सुनिश्चित गर्नका लागि सक्रिय रूपमा समस्या सम्बोधन गरेकोमा अर्थ मन्त्रालय नेतृत्वको प्रशंसा गरेका छन् ।

उनले विकास आयोजनाको सकारात्मक प्रभावलाई उच्च बनाउन स्रोतको प्रभावकारी उपयोग र परियोजना कार्यान्वयन हुनु आवश्यक रहेको बताएका छन् ।

उनले ढिलाइलाई कम गर्ने र आफ्ना परियोजना अघि बढेको सुनिश्चित गर्ने तथा एजेन्सीहरूसँग सहकार्य जारी राख्ने बताए ।