काठमाडौं । चालु आर्थिक वर्ष २०८०/०८१ को दुई महिनामा १४ निर्जीवन बिमा कम्पनीले सात अर्ब आठ करोड ४८ लाख रुपैयाँ कुल बिमा शुल्क आर्जन गरेका छन् ।
नेपाल बिमा प्राधिकरणका अनुसार निर्जीवन बिमा कम्पनीले चार लाख आठ हजार ९७३ बिमालेख बिक्रीबाट उक्त बिमा शुल्क आर्जन गरेका हुन् ।
दुई महिनाको तथ्यांक हेर्दा निर्जीवन बिमा कम्पनीहरूले सबैभन्दा कम कृषि बिमा गराएका छन् । भदौ मसान्तसम्म निर्जीवन बिमा कम्पनीहरूले कृषि तथा बाली बिमाबापत ३५ करोड ४६ लाख रुपैयाँ शुल्क उठाएका छन् ।
सबैभन्दा बढी मोटर तथा सम्पत्ति बिमाबापत शुल्क आर्जन गरेका छन् । मोटर बिमाबापत एक अर्ब ९८ करोड ८१ लाख रुपैयाँ आर्जन गरेका छन् भने सम्पत्ति बिमाबाट एक अर्ब ८९ करोड ५७ लाख रुपैयाँ आर्जन गरेका छन् ।
कम्पनीगत रूपमा हेर्दा १४ निर्जीवन बिमा कम्पनीमध्ये सबैभन्दा बढी सगरमाथा लुम्बिनी इन्स्योरेन्सले बिमा शुल्क आर्जन गरेको छ । यो कम्पनीले साउन र भदौमा ४६ हजार ९५८ बिमालेख बिक्रीबाट ९१ करोड ४७ लाख रुपैयाँ बिमा शुल्क आर्जन गरेको हो ।
त्यस्तै, बढी बिमा शुल्क आर्जन गर्ने दोस्रोमा सिद्धार्थ प्रिमियर इन्स्योरेन्स छ । यो कम्पनीले दुई महिनाको अवधिमा ५० हजार ८६१ बिमालेख बिक्रीबाट ७२ करोड ४१ लाख रुपैयाँ कुल बिमा शुल्क आर्जन गरेको छ ।
सबैभन्दा कम कुल बिमा शुल्क आर्जन नेपाल इन्स्योरेन्स कम्पनी लिमिटेडले गरेको छ । यो कम्पनीले साउन र भदौमा गरेर २३ करोड ६१ लाख रुपैयाँ कुल बिमा शुल्क आर्जन गरेको छ । उक्त अवधिमा यो कम्पनीले २७ हजार २२ बिमालेख बिक्रीबाट उक्त बिमा शुल्क आर्जन गरेको हो ।
