काठमाडौं । नेकपा (एमाले) वाग्मती प्रदेशको पहिलो अधिवेशन जारी छ । ललितपुरको च्यासलस्थित पार्टी केन्द्रीय कार्यालयमा नेतृत्व चयनको प्रक्रिया अघि बढाइएको छ ।

अध्यक्ष पदमा पाँच आकांक्षीले उमेदवारी दर्ता गराएका थिए । त्यसमध्ये केशवराज पाण्डेले आफ्नो उमेदवारी फिर्ता लिएका छन् । उनले अर्का प्रत्याशी कैलाश ढुंगेललाई समर्थन गर्ने बताएका छन् ।

अब अध्यक्षका निम्ति चार प्रतिस्पर्धी छन् । निर्वाचनमार्फत नेतृत्व चयनको तयारी गरिएको छ ।

निर्वाचनमा विद्तुतीय भोटिङ मेसिनको प्रयोग गरिँदै छ । त्यसका लागि राम–लक्ष्मण भोटिङ मेसिन पार्टी कार्यालयमा लगिएको छ । विद्युतीय मेसिनमा उमेदवारको नाम ‘इन्ट्री’ गर्न करिब चार घण्टा लाग्ने भएकाले निर्वाचन प्रक्रिया लम्बिने देखिएको छ ।

भोटिङ मेसिन अनुसन्धानकर्ता समेत रहेका निर्वाचन प्राविधिक लक्ष्मण रिमालका अनुसार अन्तिम नामावली प्रकाशन भएको चार घण्टापछि मात्र मतदान सुरु गर्न सकिन्छ ।

“उमेदवारको अन्तिम नामावली प्रकाशन भएपछिको चार घण्टा त हामीलाई नै चाहिन्छ । अन्तिम नामावली आएपछि हामीले नाम इन्ट्री गर्नुपर्छ । भर्खरै प्रारम्भिक नाम आएको जानकारी आएको छ,” उनले भने ।

एमालेले राम–लक्ष्मण इनोभेसनसँग आज बिहान ८ बजेदेखि मतदान गर्ने सम्झौता गरे पनि ढिलाइ भएको छ ।