काठमाडौं । नेपाल युथ फिटनेस एण्ड केलिसथेनिक्सको आयोजनामा राष्ट्रव्यापी पावरलिफ्टिङ प्रतियोगितामा पुरुष खुलामा बिकिन जोशी र महिला खुलामा सविता ह्यान्जु सर्वोत्कृष्ट विजेता घोषित भएका छन् । 

असोज ८ र ९ गते गरी दुई दिन चलेको प्रतियोगितामा देशभरबाट १३६ खेलाडीको सहभागिता थियो । प्रतियोगितामा पुरुष खुला, महिला खुला, जुनियर र मास्टर्स गरी कुल चार विधाभित्र ११ समूहमा प्रतिस्पर्धा भएको थियो । 

पुरुष खुलाअन्तर्गत ६२ किलोभन्दा कम तौल समूहमा निमेष चुकान, ६३–६९ किलो तौल समूहमा बिकिन जोशी, ७०–७७ किलो तौल समूहमा रविन राई, ७८–८५ किलो तौल समूहमा विकेश श्रेष्ठ र ८५ किलो तौलभन्दा माथिमा ओजस जोशीले प्रथम स्थान हासिल गरे ।

महिला खुलाको ८५ किलो तौल समूहमा सविता ह्यान्जु, ५९–६४ किलो तौल समूहमा पुनज बम्जन र ६४ किलोभन्दा माथिको तौल समूहमा शर्मिला शाह पहिलो भए ।

यस्तै, जुनियरतर्फ २१ वर्ष मुनिको उमेर समूहमा जेम्स विप्लव प्रथम भए । मास्टर्स ४५ माथिको उमेर समूहमा ताराबहादुर थापा र महिला ४० वर्ष माथिको उमेर समूहमा लक्ष्मी महर्जन पहिलो भए । 

प्रतियोगिताको सबै विधामा पहिलो हुनेले १५ हजार रुपैयाँ पुरस्कार प्राप्त गरे । यस्तै, समग्रमा पहिलो भएका बिकिन र सविताले भने नेपालको बलियो एथलेटको उपाधिसहित समान ३७ हजार ५०० रुपैयाँबाट पुरस्कृत भए ।

प्रतियोगिताको समापन समारोहमा नेपाली युथ फिटनेस एण्ड केलिसथेनिक्सका संस्थापक अध्यक्ष सुकदेव कार्की, प्रतिनिधिसभा सदस्य गगनकुमार थापा, पिन्टोला नेपालका सञ्चालक प्रेमहरी मैनाल लगायतको उपस्थिति थियो ।