काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले लेखापरीक्षण गर्नेहरू वित्तीय अनुशासनमा भए/नभएको विषयमा सार्वजनिक लेखा समितिले छानबिन गर्न आवश्यक रहेको औँल्याएका छन् । मंगलबार बसेको प्रतिनिधिसभाअन्तर्गतको सार्वजनिक लेखा समितिको बैठकमा उनले यस्तो बताएका हुन् ।

उनले महालेखापरीक्षकहरूले अंकमा बेरुजु देखाउने मात्र नभएर जवाफदेही बनाउनुपर्नेमा जोड दिए । हरेक वर्ष उच्च रूपमा बेरुजु बढ्नुको प्रमुख कारण समेत महालेखापरीक्षकले खुट्ट्याउन आवश्यक रहेको उनले बताए ।

देशको ऐन, कानुन वा नेतृत्वबारेमा महालेखापरीक्षकको दृष्टिकोण प्रस्ट हुन आवश्यक रहेको उनले उल्लेख गरे ।

“वर्षैपिच्छे बेरुजु बढ्दै जानुपर्ने कारण के हो ? त्यसमा पनि बेरुजुको आधा हिस्साभन्दा बढी देशको अर्थतन्त्र र भौतिक पूर्वाधार मन्त्रालययअन्तर्गत हुने कारण महालेखापरीक्षकको दृष्टिकोणमा, देशको ऐन, कानुन वा नेतृत्वको कारण छ । यस्ता कुराहरू आउनुपर्छ । बेरुजुसँग कोही न कोही जोडिनुपर्छ । कसको कार्यकालमा भएको हो, जवाफदेही को हुनुपर्छ,” उनले भने, “महालेखापरीक्षकले देखाइदिएर मात्रै पुग्ने तर बेरुजुको जिम्मेवारहरू माथिल्लो निकायमा जानेर अर्कोले पनि बेरुजु थप्दै थप्दै जाने हो । हामीले अंक मात्रै देखाइदिने हो ? जवाफदेही बनाउन के कुराले रोक्यो ? एक वर्षको बेरुजु अर्को वर्ष फर्छ्योट नभए को जिम्मेवारी हुने र के कुराबाट वञ्चित हुने हो भन्ने कुरा राम्रो हुन्छ । लेखापरीक्षण वित्तीय अनुशासन कायम गर्नको लागि गरिन्छ भन्छौँ, लेखापरीक्षण गर्नेहरू नै कतिको वित्तीय अनुशासनमा छन् ? लेखापरीक्षण गर्न जानेहरू रकम लिएर काम गर्ने कुराहरू आएका छन्, यो विषयमा पनि ध्यान पुग्न सक्नुपर्छ ।”