काठमाडौं । नेकपा (एमाले) वाग्मती प्रदेशको पहिलो अधिवेशन जारी छ । काठमाडौंको कमलादीस्थित नेपाल प्रज्ञा–प्रतिष्ठानमा मंगलबार बन्दसत्र सुरु भएको छ । बन्दसत्र सुरु हुनुअघि अध्यक्षमण्डल बनाइएको छ ।

गुरु बरालको नेतृत्वमा ११ सदस्यीय अध्यक्षमण्डल बनाइएको हो । बराल पार्टीको वाग्मती प्रदेश इन्चार्ज हुन् ।

अध्यक्षमण्डलले सर्वसम्मत नेतृत्वका लागि प्रस्ताव गर्नेछ । त्यसमा सहमति नभए निर्वाचन प्रक्रिया अघि बढाइने पार्टीले जनाएको छ ।

सोमबार भृकुटीमण्डपमा अधिवेशन उद्घाटन गरिएको थियो । उद्घाटनसत्रमा पार्टी अध्यक्ष केपी शर्मा ओलीलगायत नेताले सम्बोधन गरेका थिए । अधिवेशनबाट सकेसम्म सर्वसम्मत नेतृत्व चयनका लागि ओलीले आग्रह गरेका थिए ।

सर्वसम्मत हुन नसके एकल प्रतिस्पर्धामा उनले जोड दिएका थिए । प्यानलगत प्रतिस्पर्धा नगर्न उनले निर्देशन नै दिएका थिए । प्यानल बनाए उमेदवारी खारेज गर्नेसम्मको अधिकार अध्यक्षमण्डललाई दिन ओलीले निर्देशन दिइसकेका छन् ।

एमाले वाग्मती अध्यक्षका लागि कैलाश ढुंगेल, कृष्ण दाहाल, कृष्णभक्त पोखरेल, केशवराज पाण्डे, सानु श्रेष्ठलगायत नेता आकांक्षी छन् ।