काठमाडौं । माल्दिभ्सलाई ४–१ ले हराउँदै साफ यू–१९ च्याम्पियनसिपको सेमिफाइनलमा स्थान बनाएपछि नेपाली टिमका मुख्य प्रशिक्षक सुनिल श्रेष्ठले नतिजा आशाअनुरूपको भएको बताएका छन् ।

सोमबार त्रिपुरेश्वरस्थित दशरथ रंगशालामा सम्पन्न समूह ‘ए’ को अन्तिम खेलमा माल्दिभ्सविरुद्ध जित दिलाउन नेपालका समिर तामाङले दुई गोल गरेका थिए । 

यस्तै, प्रशान्त लक्षम र निराजन धामीले समान एक गोल गरे । माल्दिभ्सका अदाम लयाम राशिदले एक गोल फर्काएका थिए ।

तनावपूर्ण खेलमा माल्दिभ्सलाई हराउँदै नेपाल सेमिफाइनलमा  

खेलपछि प्रतिक्रिया दिँदै नेपाली टिमका प्रशिक्षक श्रेष्ठले जित्नै पर्ने दबाब रहेको खेलमा खेलाडीले मेहनतसाथ खेलेको बताए ।

“हामी सबैलाई बधाइ छ । आजको खेलमा हामीलाई जित्नैपर्ने दबाब थियो । यस्तो खेलमा खेलाडीहररूले गरेको मेहनतका कारण हामीले जित्यौँ,” प्रशिक्षक श्रेष्ठले भने, “अस्तिभन्दा हामीले खेल सुधार्यौ । तर, अबको खेलमा अझ सुधार आवश्यक छ । आशाअनुसारको नतिजा आयो । १–० ले भएपनि जित्नैपर्ने दबाब थियो । पाकिस्तानसँगको खेलबाट माल्दिभ्सको खेल एनालाइसिस गर्न पायौँ । त्यसले आज सहज बनायो ।”

सेमिफाइनल प्रवेशका लागि नेपाल जितको दबाबमा हुँदा माल्दिभ्सलाई भने बराबरीको नतिजा पर्याप्त थियो । यसैकारण ३० मिनेटभित्र नेपालले २–० को अग्रता बनाउँदा माल्दिभ्सका खेलाडी निकै आक्रामक बनेका थिए ।

३४औँ मिनेटमा भुटानी रेफ्री छेवाङ पेमाले विवादमा उत्रिएका माल्दिभ्सका कप्तान मोहम्मद इयान हसन र नेपालका सुजन डंगोललाई एकसाथ रातो कार्ड देखाएका थिए ।

यसपछि १० खेलाडीमा समेटिए पनि दुवै टिमको आक्रामकतामा भने कुनै कमी आएको थिएन । खेलको अन्तिम ह्विसिल बजाएपछि रेफ्रीसँग विवादमा उत्रिँदा माल्दिभ्सका अजफल मोहम्मले रातो कार्डको दर्शन गरेका थिए । 

नेपाली टिमका मुख्य प्रशिक्षक श्रेष्ठले नेपाली खेलाडीमाथि माल्दिभ्सका खेलाडी आक्रामक बनेको बताए ।

“अनुशासनमा हामीले सुरुदेखि फोकस गरेका थियौँ । अनुशासन नभएको खेलाडीलाई टिमलाई राखेका नै छैनौँ । माल्दिभ्सका खेलाडीले सुरुदेखि नै एग्रेसन देखाइरहेका थिए । माल्दिभ्सका कारण हामीले पनि रेड कार्ड खायौँ । हामीले खेलाडीको अनुशासनमा निकै नियन्त्रण गरेर राखेको हो । तर, आज मैदानभित्र माल्दिभ्सका खेलाडीले नेपाल आयोजक भएर पनि होला हामी र रेफ्रीसँग अनावश्यक बहस गरिरहेका थिए,” श्रेष्ठले भने ।