काठमाडौं । अमेरिकी राष्ट्रपति डोनाल्ड ट्रम्पले रुस र युक्रेनबीच शान्ति सम्झौता भएमा सुरक्षा ग्यारेन्टीअन्तर्गत युक्रेनमा अमेरिकी सेना पठाउने विषयलाई अस्वीकार गरेका छन् । 

फक्स न्युजसँगको कुराकानीमा अमेरिकी राष्ट्रपतिले हवाई आक्रमणको सम्भावनालाई संकेत गर्दै रुसका राष्ट्रपति भ्लादिमिर पुटिनले शान्ति प्रक्रियामा सहयोग नगरेमा उनले कठिन अवस्थाको सामना गर्नुपर्ने चेतावनी पनि दिए ।

सोमबार ह्वाइट हाउसमा भोलोदिमिर जेलेन्स्की, ट्रम्प र युरोपेली नेताहरूबीच भएको वार्तापछि ट्रम्पको यो भनाइ आएको हो । ट्रम्पले भने, “युक्रेनमा अमेरिकी सेना जमिनमा रहने छैन ।”

अन्य देशहरू सैनिक पठाउन इच्छुक
युक्रेनका लागि सुरक्षा ग्यारेन्टी कस्तो हुनसक्छ भनेर सोधिएको प्रश्नमा ट्रम्पले अन्य देशहरू जमिनमा सेना राख्न इच्छुक भएको बताए । उनले फ्रान्स, जर्मनी र बेलायतले जमिनमा सेना राख्न चाहेको बताए र यो समस्या नहुने उनको भनाइ थियो । युक्रेनको सुरक्षा ग्यारेन्टीको हिस्साको रूपमा अमेरिकी सेना जमिनमा खटिने छ कि छैन भन्ने प्रश्नमा ट्रम्पले स्पष्ट रूपमा त्यो नहुने बताए ।

उनले भने, “मेरो ग्यारेन्टी छ र म राष्ट्रपति हुँ । म केवल मानिसहरूलाई मृत्युबाट जोगाउन खोज्दैछु,” ट्रम्पले भने । 

ह्वाइट हाउस वार्ता र युरोपेली नेताहरूको भूमिका
ट्रम्पलाई ह्वाइट हाउसमा विश्व नेताहरूसँग भएको वार्ताबारे सोध्दा उनले ती नेताहरूलाई राम्रा मानिसहरू भन्दै युद्ध अन्त्य गर्न चाहेको बताए । उनले युक्रेनको द्वन्द्व युरोपेली देशहरूका लागि नजिकको विषय भएको र अमेरिकालाई समुन्द्रले छुट्याएको कारण यो उनीहरूका लागि फरक भएको बताए । “त्यसैले यो उनीहरूका लागि फरक कुरा हो । सुरक्षाको सवालमा, उनीहरू जमिनमा सेना राख्न इच्छुक छन्,” उनले थपे ।

राष्ट्रपतिले अमेरिका हवाई समर्थन जस्ता सुरक्षाका पक्षहरूमा सहयोग गर्न तयार रहेको, तर नेटोमा सामेल हुनु युक्रेनको मुख्य सुरक्षा आधार हुन नसक्ने बताए ।

जेलेन्स्कीलाई वार्तामा लचिलो हुनुपर्ने ट्रम्पको सुझाव
फक्स न्युजसँग कुरा गर्दै ट्रम्पलाई पुटिन र जेलेन्स्की समावेश त्रिपक्षीय बैठकको सम्भावनाबारे सोधिएको थियो । उनले हिजो पुटिनलाई फोन गरेको र रुसी नेताको व्यवहार राम्रो हुने आशा व्यक्त गरे । यदि त्यसो नभएमा यो कठिन अवस्था हुने उनले थपे ।

जेलेन्स्कीले आफ्नो काम गर्नुपर्ने ट्रम्पले बताए, तर उनले वार्तामा लचिलो हुनुपर्नेमा जोड दिए । उनले जेलेन्स्की र पुटिन कहिल्यै नजिकका साथी नहुने भए पनि यी दुई नेताले नै निर्णय लिनुपर्ने बताए ।

युक्रेनले धेरै जमिन पाउने 
ट्रम्पलाई ह्वाइट हाउसमा जेलेन्स्कीसहित विश्व नेताहरूसँग जमिन साटासाटको सम्भावनाबारे छलफल भएको थियो कि भनेर सोधिएको थियो । ट्रम्पले भने, “युक्रेनले आफ्नो जीवन फिर्ता पाउनेछ,” उनले भने, “उनीहरूले धेरै जमिन पाउनेछन् ।”

अन्तर्वार्तामा ट्रम्पले अगाडि भने, “तर यो युद्ध थियो,” उनले थपे, “रुस एक शक्तिशाली सैन्य राष्ट्र हो, चाहे मानिसहरूलाई मनपर्छ वा पर्दैन ।”