काठमाडौं । नेपाली राष्ट्रिय क्रिकेट टिमका बलर ललितनारायण राजवंशी अस्पतालबाट डिस्चार्ज भएका छन् । नेपाल क्रिकेट संघ (क्यान)का मेडिकल कोअर्डिनेटर डा. अभिषेकराज सिंहले राजवंशीलाई सोमबार ग्वार्कोस्थित बीएन्डबी अस्पतालबाट डिस्चार्ज गरिएको बताए ।

गएको बिहीबार कीर्तिपुरस्थित त्रिवि क्रिकेट मैदानमा अभ्यासका क्रममा ललितको क्लाभिकल बोन (ब्युटिबोन)मा चोट लागेको थियो । सोही दिन उक्त अस्पतालमा उनको शल्यक्रिया गरिएको थियो ।

“क्लाभिकल बोन (ब्युटिबोन)को शल्यक्रियापछि ललितलाई आज अस्पतालबाट डिस्चार्ज गरिएको छ । चोट हामीले सोचेभन्दा छिटो रिकभरी भइरहेकोे छ,” सिंहले बाह्रखरीसँग भने, “ललित क्यानको निगरानीमा रहनेछन् । उनको लागि एक फिजियोको व्यवस्था गरिएको छ । हामी ललितलाई ट्वान्टी–२० विश्वकपअघि नै मैदान फर्काउने प्रयासमा छौँ ।”

ललित यही चोटका कारण चीनमा जारी १९औँ एसियाली खेलकुदको क्रिकेट टिमबाट बाहिरिएका थिए । ललित खेल्न नसक्ने भएपछि क्यानले उनको स्थानमा सागर ढकाललाई राखेको छ ।

सन् २०१८ मा नेपाली टिमबाट ‘डेब्यु’ गरेका ललितले २३ एकदिवसीय अन्तर्राष्ट्रिय र १२ ट्वान्टी–२० अन्तर्राष्ट्रिय क्रिकेट खेलेका छन् । उनले एकदिवसीयमा २८ र ट्वान्टी–२० मा १० विकेट लिएका छन् ।

एसियाली खेलकुदमा पुरुष क्रिकेट यही सेप्टेम्बर २७ देखि अक्टोबर ७ सम्म सञ्चालन हुने तालिका छ । नेपालले सेप्टेम्बर २७ मा मंगोलिया र अक्टोबर १ मा माल्दिभ्ससँग खेल्ने तय छ ।