काठमाडौं । नेपाली कांग्रेस केन्द्रीय सदस्य उर्मिला थपलियाले भातृ तथा शुभेच्छुक संस्थाका अध्यक्ष वा प्रमुखहरूलाई आमन्त्रित सदस्यको रूपमा केन्द्रीय समिति बैठकमा बोलाउनुपर्ने धारणा राखेकी छन् ।

पार्टीको दोस्रो दिनको केन्द्रीय समिति बैठकमा शुक्रबार बोल्दै उनीहरूलाई बोलाएर संगठनको रिपोर्ट लिने र उनीहरूको कुरा राख्ने अवसर दिइनुपर्ने प्रस्ताव राखेकी हुन् ।

“भातृ तथा शुभेच्छुक संस्थाका अध्यक्षहरूलाई पदेनभन्दा पनि आमन्त्रित सदस्यको रूपमा बोलाएर राख्ने अवसर दिनुपर्छ भन्ने प्रस्ताव राख्न चाहन्छु । यसले संगठनलाई राम्रै गर्छ भन्ने लाग्छ,” उनले भनिन् ।

केन्द्रीय सदस्य थपलियाले स्थानीय तहमा जनप्रतिनिधि र पार्टीबीच समन्वयको अभाव भएको भन्दै विशेष अभियान सञ्चालनको खाँचो औल्याइन् । उनले समुदायमा कांग्रेस भनेजस्तै केही नाम दिएर समन्वायत्मक कार्यक्रम पार्टीले थप गर्नुपर्ने धारणा राखिन् ।

“स्थानिय तहमा जनप्रतिनिधि र र पार्टीबीच खाडल बनेको छ । त्यसमा नेपाली कांग्रेसले छुट्टै कार्यक्रम तय गरेर तीनै तहको जनप्रतिनिधि राखेर बहस नगराएर समस्या बढ्छ,” उनले भनिन् ।

युवा विदेशी पलायनले नेपालमा मृत शरीरले सन्तान कुरेर बस्नुपर्ने दिन आएको भन्दै युवालाई नेपालमा भविष्य देखाउन कांग्रेसले चिन्ता गर्न आवश्यक भएको धारणा उनको थियो ।

“महंगीको आगो बलेको छ । विदेश जाने युवाको संख्या बढेको छ,” उनले भनिन्, “अस्ति भर्खर संविधानसभा अध्यक्ष सुवासचन्द्र नेम्वाङज्यूको शरीरले तीन दिन आफ्नो छोरा कुरेर बस्यो । त्यस्तो हामी सबैको अभिभावकको दिन नआउला भन्न सकिन्न ।”