काठमाडौं । ‘विद्यालय शिक्षासम्बन्धी कानुनलाई संशोधन र एकीकरण गर्न बनेको विधेयक २०८०’ को विरोधमा यतिखेर शिक्षकहरू सडक आन्दोलनमा छन् । ७७ वटै जिल्लाका सामुदायिक विद्यालयबाट हजारौँ शिक्षक काठमाडौं आइपुगेका छन् ।

नेपाल शिक्षक महासंघले आन्दोलनको नेतृत्व गरेको छ । बुधबार काठमाडौंको माइतीघर हुँदै संसद् भवन नयाँ बानेश्वर पुगेर फर्किएको शिक्षकको र्‍याली माइतीघरमा नै फर्किएर कोण सभामा परिणत भएको छ ।

आन्दोलनमा सहभागी हुन एउटै पालिकाबाट दुईदेखि सात वटासम्म बस रिजर्भ गरेर आएको उनीहरूले बताए । 

जुलुसमा सहभागी शिक्षकले नालायक शिक्षामन्त्री राजीनामा दे, शिक्षा ऐन मूर्दावाद, शिक्षकलाई निजामती सरह सुविधा दे जस्ता नराबाजी गरेका छन् । 

काठमाडौं आउन स्थानीय तहहरूसँगको सहमतिमा अधिकांश सामुदायिक विद्यालय बन्द गरिएको छ । महासंघले आन्दोेलन स्थगित नगरेसम्मका लागि विद्यालय बन्द गरेर काठमाडौं आएको नुवाकोटका शिक्षक रमेश गिरी बताउँछन् ।

सबै सामुदायिक विद्यालय बन्द गरेर बाराबाट पाँच हजार शिक्षक आन्दोलनका लागि काठमाडौं आएको शिक्षक इन्द्रदेव यादवले बताए । 

केही जिल्लामा भने एक विद्यालयबाट तीनदेखि चारजनाका दरले शिक्षक काठमाडौं आएका छन् । ती जिल्लामा विद्यालय बन्द नगरिएको शिक्षकहरूले बताएका छन् । 

आफूहरूले राखेका माग पुरा गर्न शिक्षा, कानुन र अर्थमन्त्रीस्तरीय वार्ता हुनुपर्ने माग छ । विद्यालय बन्द नै गरेर आन्दोलनमा आउन महासंघको आह्वान गरेको थियो । 

आन्दोलनका कारण छुटेका कक्षाहरू बिदाका दिनमा समेत पढाएर कोर्स पुरा गरिने कञ्चनपुरबाट आन्दोलनमा सहभागी हुन भएकी शिक्षिका ज्योति बोहोरा बताउँछिन् । 

शिक्षा तथा प्रविधिमन्त्री अशोककुमार राईको संयोजकत्वमा सरकारले वार्ता आह्वान गरेपनि शिक्षा मन्त्रालयसँग मात्रै बस्नुको औचित्य नरहेको भन्दै महासंघ वार्तामा बस्न मानेको छैन ।