काठमाडौं । पछिल्लो पाँच महिनाको अवधिमा देशभर विपद्का घटनामा परी १८३ जनाको मृत्यु भएको छ । 

२०८० वैशाख १ गतेदेखि भदौ ३१ गतेसम्मको अवधिमा उनीहरूको मृत्यु भएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ । 

प्राधिकरणका अनुसार उक्त अवधिमा दुई हजार ७९७ वटा विपद्का घटना भएका छन् । त्यसमा ३० जना अझै बेपत्ता छन् भने ५८७ जना घाइते भएका थिए । 

बाढी, पहिरो, हाई अल्टिच्युड, चट्याङ, सर्पको टोकाइ, आगलागी, भारी वर्षा, हुरी बतास, जनावरको आक्रमण, हिमपहिरो र वन डढेलो जस्ता घटनामा उक्त मानवीय क्षति भएको हो ।

बितेको पाँच महिनामा सबैभन्दा ठूलो मानवीय क्षति पहिरोले गरेको छ । पहिरोमा परी उक्त अवधिमा ४४ जनाको मृत्यु भएको छ । 

प्राधिकरणका अनुसार वैशाखदेखि भदौसम्मको अवधिमा चट्याङ लागेर ३८, आगलागीमा परी २३, जनावरको आक्रमणबाट १९, बाढीमा परी १६, सर्पले टोक्दा १२ जनाको मृत्यु भएको छ । 

त्यस्तै, हाई अल्टिच्युडका कारण ६, भारीवर्षाका कारण दुई, हिमपहिरोमा परी १२, वन डढेँलोमा परी पाँच, हुरीबतासका कारण एक र अन्य गैरप्राकृतिक विपद्का घटनामा परी पाँचजनाको मृत्यु भएको छ । 

पछिल्लो पाँच महिनामा बाढीमा परी २०, पहिरोमा परी ९ र डुंगा पल्टिँदा एकजना बेपत्ता छन् । विपद्का घटनाले यो वर्ष हालसम्म आठ हजार ७४९ परिवार प्रभावित भएको प्राधिकरणले जनाएको छ । 

बितेको पाँच महिनामा सर्वसाधरणको एक अर्ब २८ करोड ६८ लाख १२ हजार ४७ रुपैयाँ बराबरको सम्पत्ति क्षति गरेको छ । 

सबैभन्दा ठूलो आर्थिक क्षति आगलागीका घटनाले गरेको देखिन्छ । उक्त समयमा आगलागीका घटनाले ९२ करोड आठ लाख ८७ हजार ७४७ रुपैयाँ, बाढीले २५ करोड १३ लाख ८५ हजार ५०० रुपैयाँ, भारीवर्षाले दुई करोड १३ लाख ६४ हजार रुपैयाँ र पहिरोले पाँच करोड ५१ लाख ९७ हजार २०० रुपैयाँ आर्थिक क्षति गरेको छ । 

गत वर्ष २०७९ को सोही अवधिमा (वैशाख–भदौ) देशभर रेकर्ड भएका एक हजार ७०९ वटा विपद्का घटनामा १८७ जनाको मृत्यु, १२ जना बेपत्ता र ४८१ जना घाइते भएका थिए । उक्त अवधिमा विपद्का घटनाले सर्वसाधरणको ९५ करोड ६७ लाख ३७ हजार ४३५ रुपैयाँ बराबरको सम्पत्ति क्षति गरेको थियो ।