काठमाडौं । प्रधानमन्त्री पुष्पकमल दाहाल ‘प्रचण्ड’ले बालमैत्री वातावरणमा बालबालिकाको अधिकार तथा हकहितको संरक्षण, सम्वर्द्धन, सम्मान, प्रवर्द्धन र परिपूर्ति गर्न सरकार प्रतिबद्ध रहेको बताएका छन् ।

राष्ट्रिय बाल दिवस, २०८० का अवसरमा आज शुभकामना दिँदै उनले संविधान, बालबालिकासम्बन्धी कानुन र नीतिमा भएका कानुनी, नीतिगत र संस्थागत व्यवस्था कार्यान्वयन गर्न सरकार अग्रसर रहेको बताए ।

विशेष संरक्षणको आवश्यक भएका बालबालिकाको संरक्षण र सम्वर्द्धन गर्न सम्बन्धित स्थानीय तहबाटै वैकल्पिक हेरचाह र परिवारिक सहयोग गर्नु राज्यको दायित्व भएको उनले उल्लेख गरे । प्रधानमन्त्री प्रचण्डले तीनै तहका सरकारले यस्ता बालबालिकाका लागि लगानी वृद्धि गर्न आवश्यक रहेको बताए ।

पोषण, शिक्षा, स्वास्थ्य, संरक्षण र सहभागिताजस्ता आधारभूत सबै प्रकारका बालअधिकारको संरक्षण र सम्वर्द्धन गर्न/गराउन संघीय सरकार, प्रदेश र स्थानीय तहमा आउँदो वर्षदेखि थप योजना र कार्यक्रम तर्जुमा गरी बालबालिकामा लगानी वृद्धि गर्न उनले अपिल गरेका छन् ।

बाल यौनदुर्व्यवहार, बालबालिकाविरुद्धको हिंसा, बालविवाह, बालश्रम, बालबालिकाको बेचबिखन तथा अनधिकृत ओसारपसारजस्ता घृणित कार्य नहुने गरी घरपरिवार, समुदाय, समाज र सिंगो नेपाल राष्ट्र निर्माण गर्नु सबैको साझा दायित्व र कर्तव्य भएको उनको भनाइ छ ।

“यसका लागि तीनै तहका सरकारी तथा गैरसरकारी संस्थागत बाल संरक्षण संयन्त्रहरू, राष्ट्रिय बालअधिकार परिषद्, प्रदेश बालअधिकार समिति र स्थानीय बालअधिकार समितिहरूको संस्थागत स्रोतसाधनको विकास गरी क्रियाशील बनाउनुपर्दछ,” प्रधानमन्त्री प्रचण्डले भनेका छन् ।

बालबालिकाको सर्वांगीण विकासका लागि संघ, प्रदेश र स्थानीय तहमा रहेका निकाय, सो क्षेत्रमा कार्यरत दातृनिकाय, राष्ट्रिय तथा अन्तर्राष्ट्रिय गैरसरकारी संघसंस्थालाई अनुरोध गर्दै उनले बालअधिकारको संरक्षण तथा प्रवर्द्धनका लागि थप क्रियाशीलताका साथ कार्य गर्न आग्रह गरेका छन् ।

प्रधानमन्त्री प्रचण्डले राष्ट्रिय बाल दिवसका अवसरमा सम्पूर्ण बालबालिकाको सुखी, खुसी, समृद्ध र बालमैत्री जीवनयापनको कामना गर्दै उत्तरोत्तर प्रगति र उज्ज्वल भविष्यको शुभकामना व्यक्त गरेका छन् ।

‘बालबालिकामा लगानी : सुनिश्चित भविष्यको थालनी’ नाराका साथ आज ५९औँ राष्ट्रिय बाल दिवस विविध कार्यक्रमका साथ देशभरि मनाइँदै छ । रासस