काठमाडौं । संविधानसभा अध्यक्ष सुवास नेम्वाङको निधनको शोकमा आज सरकारले सार्वजनिक बिदा दिएको छ । बिदासँगै केही अस्पतालहरुले ओपीडी सेवा बन्द गरेका छन् भने केहीमा यो सेवा सुचारु छ ।
वीर अस्पताल, राष्ट्रिय ट्रमा सेन्टर र कान्ति बाल अस्पतालले आज ओपीडी सेवा पूर्ण रुपमा बन्द गरेका छन् । यी अस्पतालमा इमर्जेन्सी तथा इनडोर सेवा भने सुचारु छन् ।
परोपकार प्रसूति तथा स्त्रीरोग अस्पतालमा बिहान १० बजेसम्म ओपीडी सुचारु गरी बन्द गरिएको छ । अस्पतालमा प्रसूति तथा अन्य सेवाहरु सुचारु छन् ।
त्रिवि शिक्षण अस्पताल भने आज बन्द छैन । प्रशासनिकबाहेक सम्पूर्ण सेवा सुचारु रहेको अस्पतालले जनाएको छ ।
त्यस्तै, पाटन र तिलगंगा आँखा अस्पतालमा पनि ओपीडीलगायत सबै सेवा सुचारु रहेको जनाइएको छ ।