काठमाडौं । नेपाली कांग्रेसका नेता कृष्ण सिटौलाले नेपालको संविधान आफैँ लेख्नुपर्छ भन्ने राष्ट्रवादी नेता सुवास नेम्वाङको निधनले राष्ट्रलाई नै क्षति पुगेको बताएका छन् ।
बाह्रखरीसँग कुरा गर्दै उनले यस्तो बताएका हुन् । यस्तो छ सिटौलाले बाह्रखरीसँग गरेको कुराकानीको सम्पादित अंश :
उहाँ मेरो अत्यन्त नजिकको हार्दिक मित्र हो । हामी पूर्व एकैतिरका हौँ । लगभग एउटै जिल्लाजस्तो पनि हो । झापा र इलाम एकैतिर भएकाले पनि हामी एउटैजस्तो भएका हौँ । उहाँ एकदमै सहयोगी भावनाको मानिस हो । नरम प्रकृतिको पनि ।
जनआन्दोलन २०६२–६३ का बेलामा नेकपा एमालेबाट आन्दोलनको कार्यदलमा निरन्तर उहाँ नै हुनुहुन्थ्यो । कांग्रेसबाट म थिएँ । आन्दोलनका सबै कार्यक्रममा सँगै थियौँ । लोकतान्त्रिक आन्दोलनमा उहाँको भूमिका महत्त्वपूर्ण थियो ।
आन्दोलन सफल भएपछि संविधानसभाको निर्वाचन भयो । संविधानसभामा सबै समितिलाई समन्वयकारी भूमिका निर्वाह पनि उहाँले अध्यक्षको नाताले गर्नुभयो । पहिलो संविधानसभा असफल हुँदा खिन्न देखिनुहुन्थ्यो । उहाँ दोस्रो संविधानसभामा अध्यक्ष भइसकेपछि महत्त्वपूर्ण कार्य गर्नुभयो ।
मस्यौदा समितिको काम सकेर विधेयक ल्याइसक्दा उहाँले तत्कालै विधेयक बुझेर छलफलको लागि सभासमक्ष पेस गर्नुभयो । अरु कोही पनि अध्यक्ष भएको भए ढिलाई गर्न पनि सक्थे । नेपालले आफ्नो संविधान आफैँ बनाउनुपर्छ भन्ने मान्यतामा हुनुहुन्थ्यो । देशभक्त नेता हो । राष्ट्रवादी चिन्तक हो ।
आफ्नो पार्टीमात्रै होइन अरु पार्टीका पनि प्रिय हुनुहुन्थ्यो । नेपालको समग्र विकासमा सबैले मिलेर काम गर्नुपर्छ भन्ने उहाँको मान्यता थियो ।
एकाध दिनअघि पनि लामो कुरा गरेको थिएँ । जतिबेला शान्ति प्रक्रिायाका विषय टुंगोमा पु¥याउन बाँकी छ । परिवर्तन बमोजिम बनेको संविधानका काम अझै बाँकी छ । द्रूत गतिमा काम गर्नुपर्छ भन्ने मान्यता थियो । यसले एमालेलाई मात्रै होइन सिंगो देशलाई अपुरणीय क्षति भएको छ ।
उहाँलाई नेपाली जनताले सधैँ नै स्मरण गर्नेछ । उहाँलाई जति प्रशंसा गरे पनि पुग्दैन । हार्दिक श्रद्धान्जली र परिवारजनमा समवेदना ।
