विराटनगर । सत्तासाझेदार दल नेकपा (एकीकृत समाजवादी)का महासचिव घनश्याम भुसालले आफ्नो पार्टीले नेपाली कांग्रेस र नेकपा (माओवादी केन्द्र)ले जे भन्छ त्यही गर्छ भन्ने धारणामा परिवर्तन आवश्यक रहेको बताएका छन् ।

आइतबार विराटनगरमा एकीकृत समाजवादी कोसी प्रदेश कमिटीको तेस्रो पूर्ण बैठकमा उनले भने, “एकीकृत समाजवादीले के गर्छ त भन्दा कांग्रेस र मओवादीले जे भन्छ त्यही गर्छ, यस्तै धारणा छ । गठबन्धन छ, गठबन्धनको सबैभन्दा सानो शक्ति हामी हौँ ।”

क्रान्ति गर्नका लागि सक्षम क्रान्तिकारी पार्टी चाहिने उनले बताए । “आफ्नो आवश्यकतालाई पूरा गर्नुपर्छ, अब त्यो आवश्यकता पूरा गर्न अब महाधिवेशनमा जानुपर्छ । विचार र सिद्धान्ततः संगठनमा मिलेर आफूले आफैँलाई नियुक्त गरेका केन्द्रीय कमिटी पदाधिकारी लामो समय रहेर एउटा व्यवस्थित पार्टी बन्दैन,” उनले भने ।

सबै असन्तुष्टिको सम्बोधन र व्यवस्थित गर्ने विधि महाधिवेशन भएको उनले स्पष्ट गरे । महाधिवेशनबाट संगठन दर्विलो हुने उनले उल्लेख गरे । आउँदो माघ १४ देखि १८ गतेसम्मका लागि पार्टी महाधिवेशनको मिति तोकिएको उनले बताए ।