काठमाडौं । नेपाली कांग्रेसका सभापति शेरबहादुर देउवाले संविधानमा समाजवादोन्मुख राष्ट्र भनेर लेखिए पनि त्यसको मर्मअनुरूप देशलाई अघि बढाउन नपाएको बताएका छन् ।

आइतबार पार्टी केन्द्रीय कार्यालय सानेपामा बीपी साहित्य महोत्सवको उद्घाटन गर्दै उनले समाजवाद र राजनीतिक विचार तथा साहित्यका विषयमा बीपीका विचारको बहस गराउन नसक्नु कांग्रेसको ठूलो कमजोरी भएको बताए ।

“नेपाल समाजवादउन्मुख राष्ट्र भनेर संविधानमा लेखेका छौँ, तर यसको मर्मअनुसार अभ्यास गर्न पाएका छैनौँ । नागरिकको समस्या र असन्तुष्टि, समाजमा देखिएका विविध विसंगतिलाई बीपीका आर्थिक, सामाजिक, धार्मिक, सांस्कृतिक, राजनीतिक विचारले मात्र समाधान गर्न सम्भव छ भन्ने दृढ विश्वास भए पनि उहाँको विचारलाई हरेक पुस्तका नागरिकबीच पर्याप्त बहस र छलफल गराउन नसक्नु कमजोरी भएका छन्,” देउवाले भने ।

बीपी अन्तर्राष्ट्रियस्तरमा समेत राजनीतिक विचारक र नेपाली समाजमा सबै किसिमका विभेदविरुद्ध ‘आगो ओकल्ने’ तथा नागरिक समावेशीता, नागरिकको न्यायिक समानता र स्वतन्त्रताको पक्षमा लड्ने व्यक्ति भएको उनले बताए ।

उनलाई भेट्न जाँदा ‘ठूलो मान्छे हैन, असल मान्छे बन्नू’ भनेको स्मरण गर्दै देउवाले बीपी मार्क्स र गान्धीलाई गहिरिएर अध्ययन गरेका नेता भएको उल्लेख गरे ।

“उहाँ अहिंसा लोकतन्त्रको सन्दर्भमा गान्धीसँग निकट हुनुहुन्थ्यो भने आर्थिक समानताका विषयमा मार्क्सवादी चिन्तलाई आवश्यक ठान्नुहुन्थ्यो,” देउवाले भने ।

बीपीका राजनीतिक, साहित्यिक, जेलमा भोग्नुपरेको जीवन, सामाजिक तथा आर्थिक, धार्मिक, सांस्कृतिक पक्षको आजको पुस्तलाई ज्ञान बाँड्ने उद्देश्यले कार्यक्रम आयोजना गरिएको उनले बताए ।

“बीपी आफैँमा बहुआयामिक तथा अनुकरणीय राजनीतिक विचारक हुनुहुन्थ्यो,” उनले भने, “साहित्यमा अजरअमर नक्षत्रको रूपमा आज पनि स्थापित हुनुहुन्छ ।”

सभापति देउवाले सबै दलहरूले कुनै न कुनै रूपमा बीपीको अनुशरण गरेको जिकिर गरे । उनले बीपी विचारले मुलुक समृद्ध बन्ने पनि बताए ।