काठमाडौं । अमेरिका पुर्‍याउने भन्दै विभिन्न मुलुकमा बन्धक बनाएर फिरौती उठाउने मानव तस्करको ठूला सञ्जाल तोडिएको छ । प्रहरीको मानव बेचबिखन अनुसन्धान ब्युरोको टोलीले अमेरिका पठाउने तस्कर गिरोहका मुख्य आरोपितलाई पक्राउ गरेसँगै सो गिरोह ध्वस्त पारेको दाबी गरेको छ ।

पक्राउ पर्नेमा अमेरिका बस्दै आएका रुकुमका हस्त गौतम छन् । ब्युरोको टोलीले ८ भदौमा कास्की पोखरा–२७ का कमल तामाङलाई पक्राउ गरेको थियो । तामाङसँगको बयानका आधारमा ब्युरोको टोलीले तस्करीका मुख्य आरोपित गौतमलाई पक्राउ गर्न सफल भएको हो । उनको दुवै खुट्टा चल्दैनन् । बैसाखीको भरमा हिँड्ने गर्छन् ।

उनी आफैँसमेत अवैध बाटो हुँदै अमेरिका पुगेको खुलेको छ । उनी अमेरिकाको ग्रिन कार्ड होल्डरसमेत हुन् ।

ब्युरो स्रोतका अनुसार पछिल्लो समय दाङ, रोल्पा रुकुमका युवाहरूलाई अमेरिकाको सपना देखाएर कमल तामाङ, जेम्म भन्ने पूर्ण लामा, हस्त गौतम, लोकेश लामा र दिनेश वलीको समूहले मोटो रकम उठाएर विभिन्न मुलुक पुर्‍याएर बन्धक बनाउने काम गर्ने गरेको खुलेको छ ।

ब्युरोमा पाँचजनाले दिएको उजुरीका आधारमा तामाङ र गौतमलाई पक्राउ गरिएको हो ।  गौतम पक्राउबारे ब्युरोले शुक्रबार सार्वजनिक गर्ने तयारी गरेको छ । उनीहरूमाथि संगठित मानव तस्करीको मुद्दा चलाएर अनुसन्धान थालिएको छ ।

उजुरी दिने पाँचजनाबाट कमल तामाङको समूहले करिब दुई करोड रुपैयाँ उठाएको खुलेको छ । गौतम समूहले युवाहरूलाई भारतको नयाँ दिल्ली हुँदै रुस, क्युबा पार गराएर अमेरिका पुर्‍याउने आश्‍वासन दिएर करोडौँ रकम असुल गर्दै आएको थियो ।

उनीहरू दिल्ली हुँदै महिनौँ लगाएर रुस, स्पने, बोलिभिया, इक्विडर, पेरू, कोलम्बिया, पानामा, कोस्टारिका, निकारागुवा, होन्डुरस, ग्वाटेमाला, मेक्सिको पुगेर नेपाल फर्किएको खुलेको छ ।

अमेरिका पुर्‍याउने भन्दै ठूलो रकम उठाउने समूहमा रोल्पाकै जेसन श्रीस समूह भने अझै सक्रिय छ । जेसनका भाइ सागर श्रीस तस्करीमा सक्रिय रहेको खुलेको छ । उनी पटकपटक पक्राउ पर्दै छुट्दै आएका छन् । सागर श्रीसविरुद्धसमेत उजुरी परेको छ । उनीहरूले करिब पाँचसयजनालाई अमेरिका पठाउने भन्दै रकम उठाएर अलपत्र पारेको प्रहरीको दाबी छ ।