काठमाडौं । कृषि तथा पशुपंक्षी विकासमन्त्री डा. वेदुराम भुसालले लम्पी स्किन रोगबाट पीडित किसानलाई राहत दिने काममा ढिलाइ नहुने बताएका छन् ।

बिहीबार प्रतिनिधिसभा बैठकमा आफ्नो मन्त्रालयसँग सम्बन्धित विषयको प्रश्नोत्तर कार्यक्रममा बोल्दै उनले सोसम्बन्धी मापदण्डमा अर्थ र गृह मन्त्रालयले सहमति दिने बित्तिकै पीडित किसानलाई राहत वितरण गर्ने बताए ।

मन्त्री भुसालले कृषि अनुदान दुरुपयोग हुन नदिनेगरी सरकारले कार्यविधिमा परिमार्जन गरिरहेको समेत जानकारी दिए ।

उनले स्वदेशमै रासायनिक मल कारखाना स्थापनाका लागि विस्तृत अध्ययनको काम सुरु भएको र त्यसबाट आउने सुझावको आधारमा सोसम्बन्धी कार्यलाई अघि बढाउने योजनामा सरकार रहेको बताए ।

उनले भने, "अनुदानको दुरुपयोग हुन नपाउने गरी अनुदान वितरण गर्न सकियोस् भनेर कार्यविधिहरूमा परिमार्जन गरिँदै छ । धान आयातलाई क्रमशः घटाउँदै लैजाने योजनामा छौँ ।"

त्यसका निम्ति यान्त्रिकीकरण योगदान गरी नै रहेको छ । स्वदेशमै रासायनिक मल उत्पादन गर्ने सन्दर्भमा अध्ययन भइरहेको छ ।