काठमाडौं । एसिया कप–२०२३ खेलेर फर्किएपछि नेपाली टिमका ओपनर ब्याटर आसिफ शेखले भारतीय टिमका ब्याटर विराट कोहलीले मेडल लगाइदिँदा गर्विलो महसुस भएको बताएका छन् ।

बुधबार स्वदेश फर्किएपछि सञ्चारकर्मीहरूसँग कुरा गर्दै आसिफले ड्रेसिङ रुममा भारतीय खेलाडीले मेडल लगाइदिँदा गर्व महसुस भएको प्रतिक्रिया दिएका हुन् ।

“राम्रो टिमसँग राम्रो स्कोर गर्दा आत्मविश्वास बढेको छ । विराट कोहलीले हामीलाई मेडल लगाइदिँदा धेरै नै प्राउड फिल भयो । अन्तिममा उहाँले एउटा मेडल मलाई पनि दिनु मैले क्याच छोडेँ नि त भन्नुभयो,” आसिफले भने ।

एसिया कपमा नेपालले विश्व क्रिकेटका दुई महाशक्ति भारत र पाकिस्तानसँग खेलेको थियो । 

भारत र पाकिस्तानसँग खेलेर फर्किएको टिमलाई बुधबार सशस्त्र प्रहरी बलको ब्याण्डले विमानस्थलमा बाँजागाँजासहित स्वागत गरेको थियो । नेपाली टिमलाई स्वागत गर्न विमानस्थलमा समर्थकहरूको भीड लागेको थियो ।