काठमाडौं । वन तथा वातावरणमन्त्री डा. वीरेन्द्रप्रसाद महतोले मन्त्रालयमा आफू आएपछि निकै महत्त्वपूर्ण कामहरू भएको दाबी गरेका छन् । कार्यभार सम्हालेको एक सय दिन पुगेको अवसरमा सोमबार सिंहदरबारमा पत्रकार सम्मेलन गर्दै मन्त्री महतोले आफूले नीतिगत सुधार र राजस्व संकलनमा महत्त्वपूर्ण काम गरेको दाबी गरे ।

नेपाल वन सेवा (गठन, समूह तथा श्रेणी विभाज र नियुक्ति) नियमहरू, २०८० (दोस्रो संशोधन) स्वीकृत गरी नेपाल राजपत्रमा भएको प्रकाशन भएको र संशोधनबाट वन सेवाअन्तर्गत संस्थागत हुने गरी वातावरण समूह थप भएको र वन सेवाका पदनामाहरूमा समसामयिक सुधार गरिएको उनको भनाइ छ ।

खनिजजन्य वन पैदावारको राजस्व दरमा देखिएको दोहोरोपन हटाउने, विभिन्न प्रजातिका बल्लाबल्लीको राजस्व दरमा पुनरवलोकनलगायतका विषयहरू समावेश भएर वन पैदावार उपयोग र व्यवस्थापनको कार्यहरूमा सरलीकरण र सहजीकरण गरिएको उनको भनाइ छ । 

संरक्षित तथा प्राकृतिक सन्तुलनसहितको चुरे–तराई मधेस भू–परिधि क्षेत्रमा वातावरणीय वस्तु र सेवाको दिगो प्रवाहसहितको आर्थिक समृद्धि हासिल गर्नेलक्ष्य सहितका कामहरू आफूले गरेको मन्त्री महतोले दाबी गरे ।

उनले २०८० जेठ १० देखि हालसम्म उत्साहजनकरूपमा काठ दाउरा उत्पादन भएको र काठ, दाउरा, जडीबुटी बिक्री तथा पर्यापर्यटनलगायतका क्षेत्रहरूबाट यस अवधिमा जम्मा दुई अर्ब ७९ करोड ७१ हजार रुपैयाँ राजस्व संकलन भएको बताए ।

मन्त्री महतोले मुलुकका निकुञ्जहरूलाई मुलुकको समृद्धिसँग जोड्नका लागि नियमावली परिमार्जन गर्ने तयारी भएको उल्लेख गरे ।

मन्त्री महतोले वन, वन्यजन्तु, वनस्पति र जैविक विविधता संरक्षण र भू तथा जलाधार संरक्षण व्यवस्थापन, वातावरण संरक्षण व्यवस्थापन र जलवायु परिवर्तन न्यूनीकरण सम्बन्धी विभिन्न कार्यक्रम कार्यान्वयन गरिएको जिकिर गरे ।