काठमाडौं । नेपाली राष्ट्रिय क्रिकेट टिमका मुख्य प्रशिक्षक मोन्टी देसाईले एसिया कपमा पाकिस्तानसँग खेल्नु सुरुआत मात्र भएको बताएका छन् ।

बुधबार एसिया कपको उद्घाटन खेलमा पाकिस्तानसँग २३४ रनले पराजित भएपछिको पत्रकार सम्मेलनमा उनले नेपालको यो सुरुआत मात्र भएको बताएका हुन् । यही स्तरमा अझै धेरै प्रतियोगिता खेल्ने टिमको चाहना रहेको उनले उल्लेख गरे ।

“हामीले के सिक्यौँ भन्ने कुरा मनन गर्न बाँकी नै छ । सिकाइको साथसाथै हामीले के–के राम्रो गर्‍यौँ भनेर पनि देखाउन बाँकी छ । हाम्रा बलरले सुरुआत राम्रो गरे । पाकिस्तानसँगको खेलमा फिल्डिङ केही निराशजनक रह्यो,” देसाईले भने, “यो स्टेजमा आएर क्रिकेटरको सपना हुन्छ, जुन आज सुरु भएको छ । यो हाम्रो सुरुआत हो, किनकि हामी यो स्तरमा अझै धेरैपटक खेल्न चाहन्छौँ ।”

पाकिस्तानविरुद्ध फराकिलो हार बेहोरे पनि त्यसको अनुभवबाट अबका खेलमा प्रदर्शन सुधारिने अपेक्षा गरिएको उनले बताए ।

“अब हामी अर्को खेलमा केन्द्रित छौँ । अब दुवै टिमले श्रीलंकाको यात्रा गर्नेछन् । त्यहाँ हामीलाई भारत–पाकिस्तानको खेल हेर्ने मौका पनि मिल्नेछ,” उनले भने, “विश्वस्तरीय बलरविरुद्ध खेल्दा केही टेम्परमेन्टर र कम्पोजर आवश्यक हुन्छ । आशा छ, टिमले आज (बुधबार)को खेलबाट सिक्नेछ र आगामी खेलमा अझ सुधारिएको प्रदर्शन देखाउनेछ ।”

एसिया कपमा देखाउने प्रदर्शनका आधारमा नेपालले अबका दिनमा भारत र पाकिस्तानको ‘ए’ टिमसँग खेल्न पाउने सम्भावना उनले व्यक्त गरे ।

देसाई थप्छन्, “अनुभवी खेलाडीबाट सिकेको कुरा आगामी खेलमा प्रयोग गरे मात्र खेलाडीले आफूमा इम्प्रुभ ल्याउन सक्छ । हामी यहाँ ग्रोथका लागि आएका हौँ । यो मञ्चमा नेपाली क्रिकेटरले देखाउने कौशलले भारत ‘ए’, पाकिस्तान ‘ए’सँग खेल्ने अवसर मिल्नेछ, जुन नेपाली क्रिकेटको विकासमा अर्को प्लेटफर्म बन्नेछ भन्ने आशा लिएको छु ।”