काठमाडौं । भारतीय राष्ट्रिय क्रिकेट टिमका क्रिकेटर रविचन्द्रन आश्विनले नेपाली समर्थकहरूलाई नेपालको रोमाञ्चक प्रतिभाको बारेमा प्रश्न गरेका छन् ।

एसिया कप–२०२३ को उद्घाटन खेलमा नेपाल र पाकिस्ताबीचको खेल सुरु हुनुअघि आश्विनले ट्विटमा नेपाली समर्थकहरूलाई आफ्नो ठाउँको प्रतिभाशाली खेलाडीहरूको बारेमा बताउन आग्रह गरेका छन् ।
 
“एसिया कप आजबाट मुल्तानमा सुरु हुँदै छ, जहाँ वीरेन्द्र सेहवागले तेहेरो शतक बनाएका थिए । तर, आजको लागि नेपाली क्रिकेटका फ्यानहरू मलाई विश्वमा तपाईंहरूको क्षेत्रबाट आउने रोमाञ्चक प्रतिभाहरूको बारेमा बताउन सक्नुहुन्छ ?,” आश्विनले लेखेका छन् ।

पाकिस्तानको मुल्तानस्थित मुल्तान क्रिकेट रंगशालामा हुने एसिया कपको उद्घाटन खेल नेपाली समयअनुसार दिउँसो ३ः१५ बजेदेखि सुरु हुँदै छ । आज नेपालले पहिलोपटक एसिया कप खेल्दै गर्दा पाकिस्तान भने १५ वर्षपछि क्रिकेटको कुनै ठूलो प्रतियोगिताको आयोजक बन्दै छ ।