काठमाडौं । स्वास्थ्य तथा जनसंख्यामन्त्री मोहनबहादुर बस्नेतले भक्तपुरस्थित सहिद धर्मभक्त राष्ट्रिय प्रत्यारोपण केन्द्रले प्रदान गर्ने सेवा विस्तार गर्न नयाँ भवन बनाइने बताएका छन् ।

सोमबार केन्द्रको अनुगमनपछि बोल्दै स्वास्थ्यमन्त्री बस्नेतले उपयुक्त भवनको अभावमा केन्द्रले प्रदान गर्ने सेवा विस्तार हुन नसेकेकाले जग्गाको ब्यवस्थापन गरेर छिट्टै नयाँ भवन बनाइने र सेवा विस्तार गर्ने बताए ।

“केन्द्रले मिर्गौला र कलेजोका बिरामीलाई प्रदान गरिरहेको सेवा उत्कृष्ट छ, भवन अभावमा सेवा विस्तार गर्न सकिएको छैन, जग्गा खोजेर र नयाँ भवन बनाउने कुरामा प्रधानमन्त्रीज्यू पनि सकारात्मक हुनुहुन्छ, यो प्रस्ताव म छिट्टै मन्त्रिपरिषद्मा लैजान्छु र कार्यान्वयन गर्छु,” मन्त्री बस्नेतले भने ।

मन्त्री बस्नेतलाई केन्द्रका कार्यकारी निर्देशक डा. पुकारचन्द्र श्रेष्ठले भौतिक संरचना अभावले बिरामीको चापअनुसार सेवा विस्तार गर्न नसकिरहेको अनुभव सुनाएका थिए ।

कम्तीमा ३० रोपनी जग्गा उपलब्ध भए नयाँ भवन बनाएर तत्कालका लागि सेवा विस्तार गर्न सकिने उनको भनाइ छ ।

केन्द्रसहित भक्तपुर अस्पताल र भक्तपुर क्यान्सर अस्पतालसहितलाई गाभेर स्वास्थ्य विज्ञान प्रतिष्ठान बनाउने योजनालाई पनि सरकारले अगाडि बढाइने पनि मन्त्री बस्नेतले बताए ।

केन्द्रले स्थापनाको एक दशकमा एक हजार एकसय ६ वटा मिर्गौला प्रत्यारोपण र १३ वटा कलेजोको सफल प्रत्यारोपण गरिसकेको छ ।

केन्द्रको अहिले सेवा सञ्चालन भइरहेको भवन भक्तपुर अस्पतालको हो । केन्द्रले लामो समयदेखि सेवा विस्तारका लागि जग्गा उपलब्ध गराइदिन स्वास्थ्य मन्त्रालयलाई आग्रह गर्दै आइरहेको भए पनि अहिलेसम्म पाएको छैन । सहिद धर्मभक्त राष्ट्रिय प्रत्यारोपण केन्द्र नेपाल सरकारको एक मात्र अंग प्रत्यारोपण केन्द्र हो ।