काठमाडौं । लोकतान्त्रिक समाजवादी पार्टी (लोसपा)का अध्यक्ष महन्थ ठाकुरले मधेस आन्दोलनका क्रममा मारिएका पार्टीका नेता–कार्यकर्तालाई अझै सहिद घोषणा नगरिएको बताएका छन् । सञ्चारकर्मीसित कुरा गर्दै उनले त्यस विषयमा सरकारप्रति असन्तुष्टि व्यक्त गरेका हुन् ।

पार्टी स्थापना दिवसको अवसर पारेर शनिबार केन्द्रीय कार्यालय बबरमहलमा एक कार्यक्रमको आयोजना गरिएको थियो । त्यसपछि उनले सञ्चारकर्मीमाझ बोलेका हुन् । उनले मधेस आन्दोलनका क्रममा जेलमा परेका र झुटा मुद्दा फिर्ता लिने विगतका सम्झौता पनि तत्काल कार्यान्वयनमा ल्याउन सरकारलाई आग्रह गरे ।

सरकारले ती मुद्दा फिर्ता लिने गरी कानुन निर्माण अघि बढाएको जानकारी गराए पनि त्यसानुसारको काम हुन नसकेको उनले गुनासो गरे ।

कार्यक्रममा नेता राजेन्द्र महतोले सबै समुदायको पहिचानसहितको अधिकार प्राप्तिको आन्दोलनलाई अझै तीव्र गतिमा अघि बढाउने संकल्प पार्टीले लिएको बताए ।

सो अवसरमा अध्यक्ष ठाकुरले पार्टीको झन्डोत्तोलन गरेका थिए । स्थापनाको दुई वर्ष पूरा भएको अवसरमा नेता–कार्यकर्ताले पार्टीलाई सशक्त बनाउने प्रणसहित शुभकामना आदानप्रदान गरेका थिए ।