काठमाडौं । ग्रिसमा नेपालीलाई अपहरण गरी फिरौती रकम लिने कार्यमा संलग्न रहेको अभियोगमा चारजनालाई प्रहरीले पक्राउ गरेको छ ।

पक्राउ पर्नेहरूमा धनकुटा महालक्ष्मी नगरपालिका–५ का ३२ वर्षीय शिवराज कुँवर, काठमाडौं तारकेश्वर नगरपालिका–५ कुमालटार बस्ने ५६ वर्षीय रामेश्वर अर्याल, कपिलवस्तु शिवराज नगरपालिका–१ का ३२ वर्षीय प्रकाश बेलाबासे र पर्वत फलेवास नगरपालिका–१ शंखपोखरी का ४२ वर्षीय दिलबहादुर थापा रहेका छन् ।

नेपालबाट सिजनल भिषामा वैदेशिक रोजगारीका सिलसिलामा गत जेठ १२ गते सर्बिया गएकी एकजना महिला र दुईजना पुरुषहरूले सर्बियामा चित्तबुझ्दो रोजगार तथा तलब सुविधा नपाएपछि लुकिछिपी ग्रिस प्रवेश गरेका थिए ।

नेपाल प्रहरीका अनुसार ग्रिस प्रवेश गर्नेक्रममा उनीहरुलाई केही व्यक्तिहरूले अपहरण गरी, डोरीले बाँधेर शारीरिक तथा मानसिक यातना र डर त्रास देखाएर १५ हजार युरो फिरौती माग गरेका थिए ।

सोही उजुरीको आधारमा केन्द्रीय अनुसन्धान ब्युरो महाराजगञ्जबाट खटिएको प्रहरीको टोलीले घटनामा संलग्न चारजनालाई पक्राउ गरेको हो ।

थप अनुसन्धानको क्रममा ग्रिस तथा दुबईबाट ह्वाट्सएपमार्फत पीडित परिवारलाई सम्पर्क गरी नेपाली २१ लाख ७५ हजार रुपैयाँ फिरौती रकम नेपालमा लिने कुँवरलाई गौरीघाटबाट भदौ २ गते पक्राउ गरिएको प्रहरीले जनाएको छ ।

नेपालमा फिरौती लिएको रकम कुँवरसँग लिन सम्पर्क भएका अर्याललाई काठमाडौं तारकेश्वरबाट भदौ ३ गते पक्राउ गरिएको थियो ।

युनाइटेड अरब इमिरेट्सको दुबईबाट नेपालमा कुँवरलाई फिरौती रकम लिन लगाउने तथा अर्याललाई रकम दिनु भन्ने बेलबासेलाई त्रिभुवन अन्तर्राष्ट्रिय विमानस्थलबाट भदौ ६ गते पक्राउ गरिएको थियो ।

दुबईमा बेलबासेलाई नेपालको अर्याललाई रकम दिनु भनी सम्पर्क नम्बर दिने थापालाई त्रिभुवन अन्तर्राष्ट्रिय विमानस्थलबाट भदौ ६ गते नै पक्राउ गरिएको प्रहरीले जनाएको छ ।

उनीहरूमाथि अपहरण तथा शरीर बन्धक मुद्दामा म्याद थप गरी आवश्यक अनुसन्धान भइरहेको छ ।