काठमाडौं । कृषि तथा पशुपन्छी विकासमन्त्री डा. बेदुराम भुसालले लम्पी स्किन रोगबाट मरेका पशुको बिमा दाबी भुक्तानी गरिने बताएका छन् । बिहीबार प्रतिनिधिसभाको बैंठकमा बोल्दै मन्त्री भुसालले यस्तो बताएका हुन् ।

“यो रोग लागेर मरेका बिमित पशुको बिमा भुक्तानी सम्बन्धमा कृषि तथा पशुपन्छी विकास मन्त्रालय, अर्थ मन्त्रालय र नेपाल बिमा प्राधिकरणले सहजीकरण गर्ने लगायतका निर्णय भएको र त्यसैअनुसार काम अगाडि बढाइएको जानकारी पनि यही सदनबाट जानकारी गराउन चाहन्छु,” उनले भने ।

यस रोगबाट आक्रन्त पशुहरूको तथ्यांक र उपचार तथा रोकथामका लागि गरेका पहल सार्वजनिक गर्ने गरेको पनि उनले जानकारी दिए ।

यो रोग नियन्त्रणका लागि स्थानीय सरकारलाई आवश्यक कार्य गरिरहेको पनि जानकारी दिए । १६१ स्थानीय तहमा पशुरोग प्रयोगशाला स्थापनाका लागि आवश्यक रकम विनियोजन गरिएको पनि उनले जानकारी दिए ।