काठमाडौं । कीर्तिपुरस्थित कुखुराको खोरमा छिरेको चितुवा भागेको छ । कीर्तिपुर नगरपालिका–४, मच्छेगाँउस्थित रसुवाका पुण्यप्रसाद तामाङको कुखुरा फार्ममा बिहीबार बिहान पसेको चितुवा भागेको हो ।

चितुवाको आक्रमणबाट तामाङ घाइते भएका छन् । चितुवा खोरमा पसेपछि त्यसलाई नियन्त्रणमा लिन थानकोट प्रहरी वृत्तको टोलीले वन कार्यालयलाई खबर गरेको थियो ।

त्यसपछि वन कार्यालयको टोली पनि त्यहाँ पुगेको थियो । तर, टोलीले चितुवालाई नियन्त्रणमा लिन सकेन ।

चितुवा मच्छेगाउँमाथिको जंगलतर्फ भागेको थानकोट प्रहरी वृत्तका प्रमुख एवं डीएसपी नारायण अधिकारीले जानकारी दिए ।

“चितुवा खोरमा पसेपछि हामीले नियन्त्रणमा लिनको लागि वन कार्यालयसँग समन्वय गरेका थियौँ । वन कार्यालयको टोली आएर चितुवा लट्ठ्याउने प्रयास पनि गर्नुभयो, तर चितुवा भागेर जंगलतर्फ नै भाग्यो,” डीएसपी अधिकारीले बाह्रखरीसित भने ।