काठमाडौं । नेपाली कांग्रेसका नेता डा. शेखर कोइरालाले शीर्ष नेताहरुले कोसी प्रदेश सरकारका विषयमा बलमिच्याइँ गरेको आरोप लगाएका छन् ।

मोरङको सुन्दरहरैँचामा आयोजित दुलारी सरोकार मञ्चको वार्षिकोत्सव तथा सम्मान कार्यक्रममा कोइरालाले कोसी प्रदेशलाई केन्द्रका नेताहरुको हस्ताक्षेपले समस्यामा पारेको बताए ।

“संविधानले एउटा अधिकार दिएको छ, तर नेताहरु एकठाउँमा बस्नुहुन्छ र आफू अनुकूलका निर्णय गर्नुहुन्छ । यसरी देशलाई कहाँ पुर्याउन खोजेको ?,” प्रश्न गर्दै कोइरालले भने, “अदालतले जे नगर्नु भन्यो, शीर्ष नेताहरु बसेर फेरि त्यही गर्नुभयो । संविधान र अदालतमाथिको यस्तो बलमिच्याइँ कहिलेसम्म ?”

उनले कोसी प्रदेश सरकारका विषयमा यसअघि नै सर्वोच्च अदालतले सभामुखले हालेको मत वैध नहुने भनेकोमा फेरि पनि त्यही गरिएको बताए । नेताहरुको चरम राजनीतिले समाज ध्रुवीकरण हुँदै गएको र सामाजिक सद्भाव समेत बिथोलिएको कोइरालाको भनाइ थियो ।

कार्यक्रममा २०१५ सालदेखि हालसम्म निर्वाचित स्थानीय प्रतिनिधि तथा तीनका परिवारलाई सम्मान गरिएको थियोे ।