काठमाडौं । नेकपा (एकीकृत समाजवादी)का महासचिव घनश्याम भुसालले नेपाली कांग्रेसका दिवंगत नेता प्रदीप गिरि मार्क्सवादी रहेको बताएका छन् । सोमबार गिरिको प्रथम स्मृति दिवसका अवसरमा काठमाडौंमा आयोजित ‘प्रजातान्त्रिक समाजवादका आयामहरू’ विषयक कार्यक्रममा उनले यस्तो बताएका हुन् ।

आफ्नो जीवनकालमा गिरि मार्क्सवादी रहेको र उनले संसारका सारा समस्याको समाधान मार्क्सवादमा देखेको भुसालको भनाइ छ । मार्क्सवादका विषयमा जान्ने एसियाका केही मानिसभित्रमा गिरि पर्ने उनले उल्लेख गरे ।

गिरिको प्रजातान्त्रिक समाजवाद, मार्क्सवाद र स्वतन्त्रताको व्याख्यामा श्रमजीविकाप्रति निःसर्त प्रतिबद्धताबाहेक अरू केही नरहेको उनले बताए । गिरिको जीवनमा बोल्ने र गर्ने कुराको तादाम्य पनि मिलेको उनको बुझाइ छ ।

“हाम्रो पार्टीमा मसँग सोधियो, कांग्रेसलाई ल्याएर मार्क्स पढाउने ? भन्ने खालको कुरा भयो । मैले भनेको थिएँ, मैले सोचेरै भनेको, अहिले पनि त्यो उत्तरका प्रति मलाई कुनै पश्चाताप छैन । मैले के भनेको थिएँ भने– मार्क्सको बारेमा जान्ने एसियामा प्रदीपजत्तिको कतिजना मान्छे छन् ? सोचौँ । मैले हाम्रो नेतालाई उत्तर दिएको थिएँ । एसियामा कतिजना मान्छे छन् ? औँलामा गन्न सक्ने मान्छे होलान् भनेको थिएँ । म आफूले त्यसरी बुझ्थेँ । उहाँ कति मार्क्सवादी हुनुहुन्थेन भनेर कसैले भन्छ भने त्यो एउटा कुरा हुनसक्छ । नत्र भनेदेखि उहाँले कबुल गरेको कुरा हो कि उहाँ मार्क्सवादी हुनुहुन्थ्यो,” उनले भने, “उहाँले आजसम्मका जिन्दगीका, संसारका सारा समस्याको समाधान मार्क्समा देख्नुहुन्थ्यो । र, स्वयं मार्क्समा पनि केही समस्याहरू देख्नुहुन्थ्यो । त्यसको खोजीका लागि भौँतारिइरहनुभएको थियो । मैले बुझेको प्रदीप गिरि यही हो । यो कुरा उहाँले नै बोलेको कुरा हो । कैयौँ मार्क्सवादीहरूले मार्क्सको खोल मात्रै ओढेर गैरमार्क्सवादी भइरहेको बेलामा, अर्कै बाटो लिइराखेको यो युगमा प्रदीप गिरि त्यो अविभाजित व्यक्तित्वको मान्छे हो, जसको भन्ने र गर्ने कुरा सामान्यतया त्यति नजिक । बोल्ने र गर्ने एउटै गर्नु भनेको जिन्दगीको असाधारण उपलब्धि हो जस्तो लाग्छ । मैले देख्दा प्रदीप गिरि त्यो अविभाजित व्यक्तित्वको मान्छे हुनुुहुन्थ्यो । उहाँको प्रजातान्त्रिक समाजवाद, मार्क्सवाद, स्वतन्त्रता यो सारा कुराको व्याख्या श्रमजीविकाप्रति निःसर्त प्रतिबद्धताबाहेक केही पनि थिएन भन्ने म असाध्यै प्रस्ट छु ।”