काठमाडौं । नेकपा (माओवादी केन्द्र)का नेता गिरिराजमणि पोखरेलले सरकारले सुशासनका पक्षमा गरेको कामलाई सफल बनाउन सबैले साथ दिनुपर्ने बताएका छन् ।
माओवादी केन्द्र वाग्मती प्रदेश सम्पर्क समन्वय समितिको बैठकमा शनिबार उनले वर्तमान सरकारले मुलुकमा भ्रष्टाचार अन्त्य गर्दै सुशासनसहितको समृद्धिको लक्ष्य लिएको उल्लेख गरे । सरकारको लक्ष्यलाई सफल बनाउन सबैले साथ दिनुपर्नेमा उनले जोड दिए ।
राजनीतिलाई अपराधीकरण गर्ने र अपराधलाई राजनीतिकरण गर्ने प्रवृत्तिलाई अन्त्य नगरेसम्म मुलुक आर्थिक विकासको बाटोमा अघि बढ्न नसक्ने उनले बताए ।
अन्तर्राष्ट्रिय शक्तिले मुलुकलाई क्रीडास्थल बनाउन खोजिरहेको भन्दै नेता पोखरेलले राष्ट्रियताको जगेर्ना गर्नु अहिलेको कार्यभार रहेको पनि बताए ।
संगठनलाई बलियो बनाउन सके मात्र पार्टी बलियो हुने भएकाले नेता तथा कार्यकर्ताले यसतर्फ विशेष ध्यान दिनुपर्ने उनले उल्लेख गरे ।