काठमाडौं । बाह्रखरी मिडियाको विशेष सम्पादकमा हरिबहादुर थापा नियुक्त भएका छन् । बाह्रखरी मिडियाले शुक्रबार थापालाई विशेष सम्पादकमा नियुक्त गरेको हो । मिडियाका कार्यकारी अध्यक्ष तथा प्रधान सम्पादक प्रतीक प्रधान र प्रबन्ध निर्देशक ज्ञानेश्वर आचार्यले थापालाई स्वागत गरेका थिए ।

थापा पत्रकारिता तथा आमसञ्चारमा स्नातकोत्तर हुन् । थापाका भ्रष्टाचारको शल्यक्रिया, ‘एनाटमी अफ करप्सन’ विदेशी सहायताका विसंगति, राजनीतिक दाउपेचभित्र कर्मचारीतन्त्र, दलीय द्वन्द्व, रजगजलगायतका पुस्तक प्रकाशित छन् ।

त्यसैगरी थापाले ‘मेरा नौ दशक’ पूर्वप्रधानमन्त्री सूर्यबहादुर थापाको आत्मकथाको सम्पादन पनि गरेका छन् ।

थापा यसअघि इकागज डट कमको प्रधान सम्पादक थिए भने त्यसअघि साढे दुई दशक कान्तिपुर दैनिकमा आवद्ध हुँदै सम्पादकको जिम्मेवारी सम्हालेका थिए । अन्नपूर्ण पोस्टमा पनि प्रधान सम्पादकको भूमिका निर्वाह गरेका थापाले बाह्रखरीलाई थप उचाईमा पुर्‍याउन आफ्नो योगदान रहने बताए ।

“मेरो पत्रकारिताको लामो अनुभव बाह्रखरीलाई थप उचाईमा पुर्‍याउन केन्द्रित हुनेछ,” थापाले पदभार सम्हाल्दै भने । 

थापासँगै बाह्रखरी मिडियामा शुक्रबारदेखि नै थप तीन जना वरिष्ठ पत्रकार तथा कर्मचारी पनि थप भएका छन् । 

बाह्रखरी मिडियाको सहायक समाचार सम्पादकमा सुरेन्द्र पौडेल र वरिष्ठ संवाददातामा कृष्ण सिंह लोथ्याल नियुक्त भएका छन् ।

पौडेल यसअघि नागरिक दैनिक, बाह्रखरी मिडिया, देखापढीलगायतका मिडियामा आवद्ध थिए भने लोथ्याल शीलापत्र डट कममा आवद्ध थिए । 

त्यसैगरी व्यवस्थापनतर्फ सन्तोष शर्मालाई प्रबन्धक (म्यानेजर) पदमा नियुक्त गरिएको छ । शर्मा यसअघि कान्तिपुर मिडियामा आवद्ध थिए ।