विराटनगर । मोरङको विराटनगरस्थित कोसी अस्पतालमा सुत्केरीको मृत्यु भएको छ । आठ दिनकी सुत्केरीको मृत्यु भएपछि अस्पताल परिसरमा बिहीबार रातभर तनाव भयो । आफन्तले अस्पताल परिसर घेराउ गर्दै सत्यतथ्य सार्वजनिक गर्न माग गरे ।

सो अस्पतालको आईसीयूमा उपचाररत मोरङकै रंगेली नगरपालिका–३ की १८ वर्षीया सुलेखा मण्डल कामतको बिहीबारै राति मृत्यु भएको हो । परिवारका अनुसार सामान्य प्रसूतिमार्फत उनले गएको साउन २४ गते रंगेली अस्पतालमा शिशुलाई जन्म दिएकी थिइन् ।

त्यसको दुई दिनपछि घर पठाइएकी उनलाई श्वासप्रश्वासमा समस्या भएपछि साउन २८ गते कोसी अस्पतालमा ल्याइएको परिवारले जनाएको छ ।

उपचारमा हेलचेक्र्याइँ गरिएको भन्दै परिवार र आफन्तले राति अस्पताल परिसरमा प्रदर्शन र नाराबाजी गरेका थिए । वडा प्रहरी कार्यालय विराटनगरका डीएसपी विजय श्रेष्ठले भने, “घटनाबारे अस्पताल प्रशासन र मृतकका परिवारले आज शुक्रबार छलफल गर्ने सहमति भएको छ ।”