काठमाडौं । सर्वोच्च अदालतलका पूर्वन्यायाधीश उदयराज उपाध्यायको निधन भएको छ । वि.स. १९९१ मा रौतहटमा जन्मिएका उपाध्ययायको गएराति ११ः३० मा निधन भएको हो ।

२०२३ सालदेखि इलाका न्यायाधीशको रूपमा सेवा सुरु गरेका उपाध्याय ०४९ देखि ०५७ सालसम्म सर्वोच्चको न्यायाधीश भएर काम गरेका थिए । सर्वोच्च अदालतले उनको निधनमा एकदिनका लागि इजलास बन्द गरेको छ । पेसी सूचीमा आजका लागि ३२७ मुद्दा चढेका थिए ।

सर्वोच्च अदालतलले न्यायाधीश उपाध्यायलाई ‘संविधान र कानुनको क्षेत्रमा दख्खल राख्ने निर्भिक, सरल, अत्यन्त मिलनसार, विवेकशील, सहृदयी, मृदुभाषी, न्यायका मर्मज्ञ एवम् अनुभवी न्यायिक व्यक्तित्वका रूपमा’ स्मरण गरेको छ ।

“स्वर्गीय उपाध्याय न्याय र कानुनका क्षेत्रमा आदर्श व्यक्तित्व हुनुहुन्थ्यो । साथै उहाँ न्यायाधीशको रूपमा अत्यन्त ओझपूर्ण व्यक्तित्व रहनुभएको र प्रतिष्ठित न्यायाधीश हुनुहुन्थ्यो। उहाँको योगदान भावी पुस्ताका लागि सदैव प्रेरणादायी र मार्गदर्शक रहिरहने छ,” सर्वोच्चको विज्ञप्तिमा भनिएको छ ।

उपाध्यायले २०१७ बैशाख २३ मा इलाका न्यायाधीशको रूपमा इलाका अदालत पाल्पाबाट न्याय सेवा प्रवेश गरी २०२५ असार १ मा धनुषा जिल्ला अदालतको न्यायाधीश, २०२८ कात्तिक ८ गते वाग्मती अञ्चल अदालतको कायममुकायम अञ्चल न्यायाधीश भएका थिए ।

त्यस्तै, २०४० मंसिर १२ मा क्षेत्रीय अदालतको न्यायाधीश, २०४८ कात्तिक १८ मा तत्कालीन पुनरावेदन अदालतको मुख्य न्यायाधीश हुँदै मिति २०४९ माघ १ मा सर्वोच्च अदालतको न्यायाधीश पदमा नियुक्त भई २०५७ भदौ २३ बाट सर्वोच्च अदालतबाट अवकाश प्राप्त गरेका थिए ।