काठमाडौं । बोलीमा लगाम लगाउन नसक्दा धेरै कलाकारले पटक–पटक गाली खाँदै आएका छन् । होस पुर्‍याएर नबोल्नेमा नयाँदेखि पुराना कलाकारसम्म छन् । यो मामलामा तुलनात्मक रूपमा पुरानाभन्दा नयाँ कलाकारको संख्या अधिक छ ।

सामाजिक सञ्जालमा होस् वा मिडियामा बोल्दा विवेक नपुर्‍याउँदा उनीहरूले गाली खाँदै आएका छन् । यसरी गाली खानेमा दीपाश्री निरौलादेखि पछिल्लो पुस्ताकी आँचल शर्मासम्म पर्छिन् । बोलीमा होस नपुर्‍याउनेमा पूर्जा शर्मा, वर्षा राउत, प्रियंका कार्की पनि हुन् ।

कोरोना संक्रमणको त्रासको समयमा देश लकडाउनमा रहेका बेला नेपाली सिनेक्षेत्र ठप्प थियो । महँगो पारिश्रमिक लिने कलाकार/निर्देशकमा ठूलो प्रभाव नपरे पनि दैनिक काम गरेर खाने प्राविधिक समस्यामा थिए । उनीहरूलाई केही कलाकारले राहत समेत प्रदान गरेका थिए । प्राविधिकको संस्था चलचित्र प्राविधिक संघले राहत संकलन र वितरण गरेको थियो ।

सोहीक्रममा कलाकार तथा निर्देशक दीपाश्री निरौलाले एक टेलिभिजन कार्यक्रममा ‘राजेश हमालले महानायकको भूमिका निर्वाह गर्न नसकेको’ बताएकी थिइन् । प्राविधिकले खाना खान नपाइरहेको अवस्थामा राजेशले सहयोग नगरेको भन्दै उनले आलोचना गरेकी थिइन् ।

उनको त्यो अन्तर्वार्ता सार्वजनिक भएसँगै राजेशका प्रशंसकले दीपाश्रीलाई गाली गरे । उनले यति धेरै गाली खाइन्, माफी नै माग्नुपर्‍यो । पछि राजेश आफैँले आफूविरुद्ध बोल्ने कसैलाई पनि गाली नगर्न आग्रह गरे ।

तर, दीपाश्रीमाथिको गाली रोकिएन । त्यही कारण उनलाई ‘मुन्द्रेको कमेडी क्लब’बाट हटाइयो । उनलाई दर्शकले गाली गरेकै कारण ‘छक्का पञ्जा–४’ अर्कैले निर्देशन गरे । ‘छक्का पञ्जा’का सिरिज उनले निर्देशन गर्दै आएकी थिइन् । तर, ‘छक्का पञ्जा–४’ हेमराज बिसीले निर्देशन गरे । भलै, निर्माण पक्षले यही कारण दीपाश्रीले यो सिरिज निर्देशन नगरेको पुष्टि गरेको छैन । योबाहेक भने दीपाश्री खासै विवादमा आएकी पात्र होइनन् ।

आँचल पनि ‘ट्रोल’ बनिरहने नायिकामध्येकी एक हुन् । बोल्न भाँती नपुर्‍याउँदा उनी आलोचनाको केन्द्रमा रहने गरेकी छन् । ‘बढी टिकटक चलाउने गरेका कारण महिला धेरै क्रिएटिभ हुने’ बताएपछि उनी ट्रोलको सिकार बनेकी थिइन् ।

यस्तै, नायिका पूजा शर्मालाई ‘अग्रज’ भनेपछि आँचलको आलोचना मात्र भएन, ट्रोल नै बनिन् । उनले आफूभन्दा धेरै अगाडि पूजा चलचित्र उद्योगमा आएको बताएकी थिइन्, जबकि उनीहरू दुवै एउटै जेनेरेसनका नायिका हुन् । पूजालाई अग्रज भनेपछि आँचललाई उनका फ्यानले नै अग्रजको अर्थ बुझ्न सुझाव दिएका थिए ।

पूजा शर्मा पनि समय–समयमा ट्रोल हुने नायिका हुन् । ‘नेपालमा ७२ प्रदेश र १४ जिल्ला रहेको’ बताएपछि पूजा ट्रोल बनेकी थिइन् । एक टेलिभिजन अन्तर्वार्तामा यस्तो बताएपछि आफ्नै देशबारे न्यूनतम जानकारी समेत नरहेको भन्दै उनको चर्को आलोचना गरिएको थियो ।  

प्रियंका कार्की पनि बाक्लै विवादमा आउने नायिका हुन् । ‘यूएसचाहिँ धेरैपटक गइरहेको थिएँ, तर अमेरिका भने पहिलोपटक आएको हुँ’ भनेपछि प्रियंका ट्रोल बनेकी थिइन् । अमेरिकामै एक अन्तर्वार्ताका क्रममा यस्तो बताएपछि उनलाई धेरैले ट्रोल बनाएका थिए ।

बोली र तस्बिरमार्फत उनी धेरै ट्रोल हुने गरेकी छन् । बोलीभन्दा पनि उनी तस्बिरमार्फत धेरै विवादमा पर्ने गरेकी छन् ।

केही वर्षअघि ‘बेबी बम्प’को फोटोसुट गराउँदा पनि उनी ट्रोल बनेकी थिइन् । तस्बिरमा उनले हातमा गिलास लिएर जुस पिइरहेको देखिएको थियो । पेटमा पनि गिलासबाट जुस पिइरहेको तस्बिर कोरिएको थियो । यो तस्बिर सार्वजनिक भएपछि भद्दा कमेन्ट धेरै गरिएको थियो ।

वर्षा राउत पनि बेलाबेलामा बोलीका कारण विवादमा तानिइरहने नायिका हुन् । नेपाल र भारतबीचको सीमा विवादका सन्दर्भमा दिएको अभिव्यक्तिका कारण उनले आलोचना खेपेकी थिइन् ।

उनले भनेकी थिइन्– देशको माया लाग्छ भन्दैमा यो हाम्रै हो, तिमीहरूले किन यस्तो गरेको भनेर झगडा गर्ने कुरा होइन । यो त टेबल टक गरेर यता र उताको सरकार मिलेर गर्ने कुरा हो । यहाँ त दुवैतर्फका पत्रकार मिलेर झगडा पारिरहेका छन् ।

योसँगै वर्षाले ‘मेरो इन्डियन साथीहरूसँग मैले कसरी फेस गर्ने र मेरो इन्डियन साथीहरूले मसित कसरी फेस गर्ने भइरहेको छ’ भन्ने बताएपछि ट्रोल बनेकी थिइन् । सामाजिक सञ्जालमा विरोध हुन थालेपछि उनले ‘आइन्दा विचार पुर्‍याएर मात्र बोल्ने’ बताएकी थिइन् ।

त्यसपछि उनी तस्बिरका कारण पनि विवाद र चर्चामा रहिन् ।

वर्षा शिवाकोटीको पनि बेलाबेलामा नकारात्मक चर्चा हुने गरेको छ । उनी बोलीभन्दा तस्बिरमार्फत विवादमा आउने नायिका हुन् ।