काठमाडौं । पाकिस्तानी राष्ट्रपति आरिफ अल्वीले अनवर–उल–हक काकरलाई कार्यवाहक प्रधानमन्त्रीका रूपमा नियुक्त गरेका छन् । शनिबार राष्ट्रपति आरिफ अल्वीले काकरलाई कार्यवाहक प्रधानमन्त्रीका रूपमा नियुक्त गरेका हुन् ।

राष्ट्रपतिले पाकिस्तानको संविधानको धारा २२४ (१ ए) बमोजिम उक्त स्वीकृति दिएका हुन् । प्रधानमन्त्री शहबाज शरिफ नेतृत्वको मन्त्रिपरिषद्ले संसद् विघटनको निर्णय गरेपछि विपक्षी दल समेतको सहमतिमा काकर कार्यवाहक प्रधानमन्त्री बनेका छन् ।

कार्यवाहक प्रधानमन्त्री चयनका विषयमा निवर्तमान प्रधानमन्त्री शहबाज शरिफ र विपक्षी दलका नेता राजा रियाजबीच शनिबार छलफल भएको थियो । सोही छलफलपछि काकरको नाममा सहमति जुटेको हो ।

काकर मार्च २०१८ देखि पाकिस्तानको सिनेटको सदस्य छन् । उनी सन् २०१८ को पाकिस्तानी सिनेटको निर्वाचनमा दक्षिणपश्चिम बलुचिस्तान प्रान्तबाट स्वतन्त्र उमेदवारका रूपमा निर्वाचित भएका थिए । सिन्ह्वा/न्युज एजेन्सी नेपाल