काठमाडौं । नेपाल निर्माण व्यवसायी महासंघको दोस्रो चरणको आन्दोलनअन्तर्गत आज देशभरका निर्माण व्यवसायीहरूले काठमाडौं सेफ्टी हेल्मेट र ज्याकेट लगाएर सिटी जुलुस निकालेका छन् । उनीहरूले हातमा कालो पट्टी बाँधेका थिए ।

महासंघको निर्देशनबमोजिम ७७ जिल्लाबाट आएका निर्माण व्यवसायीहरू जुलुसमा सहभागी भएका हुन् । महासंघका अध्यक्ष रवि सिंहको नेतृत्वमा महासंघ सचिवालय अनामनगरबाट सुरु भएको जुलुस संसद् भवन नयाँ बानेश्वर अगाडि कोण सभामा परिणत भएको थियो ।

कोण सभालाई सम्बोधन गर्दै महासंघका अध्यक्ष रवि सिंहले सरकारले व्यवसायीहरूका जायज माग पूरा नगरेका कारण बाध्य भएर दोस्रो चरणको आन्दोलन सुरु गर्नुपरेको बताए ।

महासंघका महासचिव रोशन दाहालले सामान्य तरिकाले राज्यले व्यवसायीहरूको समस्या नसुनेका कारण सिटी फुकेर ध्यानाकर्षण गराइएको बताए ।